मोरङ उखुबारी हत्याकाण्डको सफल अनुसन्धान गर्ने प्रहरी अधिकारीहरु पुरस्कृत भएका छन् । १ नं. प्रदेश प्रहरी कार्यालयले जिल्ला प्रहरी कार्यालय मोरङका प्रमुख एसपी जनार्दन जिसीसहित प्रहरी अधिकारीलाई पुरस्कृत गरेको हो ।
पुरस्कृत हुने अधिकारीहरुमा एसपी जिसीसहित डीएसपी दीपक श्रेष्ठ, प्रहरी सहायक निरीक्षक हरेन्द्रकुमार ठाकुर, प्रहरी हवल्दारद्वय जीतेन्द्र चौधरी र भक्तबहादुर ठकुरी छन् । उनीहरुलार्य १ नं. प्रदेश प्रहरी कार्यालयका प्रमुख डीआईजी अरुणकुमार बिसीले पुरस्कृत गरेको प्रदेश प्रहरीका प्रवक्ता एसपी नवीनराज राईले जानकारी दिए ।
मोरङको धनपालथान–७ स्थित उखुबारीमा गत १२ र १३ माघमा दुईटा शव फेला परेको थियो । यस्तै, ललितपुर महानगरपालिका–१२ ठेचोस्थित घरको कम्पाउन्डभित्र पनि एउटा शव फेला परेको थियो ।
तीनै जनाको श्रृंखलाबद्ध तवरले हत्या गरी जमिनमुनि गाडिएको अवस्थामा फेला परेको आपराधिक घटनाको अनुसन्धानपछि प्रहरीले मुख्य योजनाकारसहित अभियुक्तहरुलाई पक्राउ गर्न सफल भएको थियो ।
