काठमाडौं- एफए कपमा जित निकाल्दै म्यानचेस्टर सिटी र क्रिस्टल प्यालेस क्वार्टरफाइनलमा प्रवेश गरेको छ भने हारसँगै टोटेनहम हट्स्पर प्रतियोगिताबाटै बाहिरिएको छ।
मंगलबार राति सम्पन्न खेलमा जित निकाल्दै सिटीले पिटरबोर्गलाई २-० गोलले हराउँदै क्वार्टरफाइनल यात्रा तय गरेको हो। सिटीलाई जित दिलाउन रियाद महरेज र ज्याक ग्रिलिसले गोल गरेका थिए।
त्यस्तै, स्टोक सिटीलाई २-१ गोलले हराउँदै क्रिस्टल प्यालेसले पनि अन्तिम आठमा स्थान बनाएको छ। क्रिस्टलको जितका लागि चेखोउ कोउयाते र जाइरो रिडेवाल्डले गोल गरेका थिए। स्टोकका जोम टायमसनले एक गोल फर्काए।
टोटेनहम हट्स्पर भने मिडलसबर्गसँग १-० गोलको हार बेहोर्दै प्रतियोगिताबाटै बाहिरिएको छ। खेलको निर्धारित ९० मिनेटसम्मा गोल नभएपछि थपिएको ३० मिनेटभित्र गोल बेहोर्दै टोटेनहमले हार बेहोरेको हो।
