केहि समय यता स्वदेशी ब्रान्ड वाला चेन रेष्टुरेन्टहरुले बजारमा आफ्नो नाम राख्न सफल हुदै गएका छन् । ति नै चेन रेष्टुरेन्टहरु मध्य आफ्नो छुट्टै नाम र पहिचान बनाउन सफल रहेको ब्रान्ड हो ‘बिरयानी अड्डा’ । बिरयानी अड्डा काठमाडौंको मध्य बानेश्वरबाट शुरु भएको थियो । युरोप र गल्फमा बसेर नेपालमै केहि गरौ भन्ने उद्देश्यका साथ फर्किएका चार जना युवाहरुले सो रेष्टुरेण्ट व्यवसाय सञ्चालनमा ल्याएका हुन् । भक्तपुर घर भएका राजन खनाल, रामेछापका नवराज कार्की र दोलखाका रविन पाण्डेसहित ४ जना मिलेर सो चेन रेष्टुरेण्ट शुरु गरेका हुन् ।
स्थापनाको दुई वर्ष पुरा भएको अवसरमा सो चेन रेष्टुरेन्टले आफ्नो वार्षिकोत्सव मनाएको छ । कोभिड–१९ संक्रमणको पहिलो लहर शुरु हुनुभन्दा केही दिनअघि मात्रै शुरु भएको ‘बिरयानी अड्डा’ ले आफ्नो स्थापनाको दुई वर्ष पुरा गरेको छ । मध्य बानेश्वरमा बिरयानी अड्डा शुरु गरेको ११ औं दिनमा लकडाउन भएसँगै ‘होम डेलिभरी’ लाई केन्द्रमा राखेर व्यवसायलाई निरन्तरता दिदै अघि बढेको लगानीकर्ता मध्येका रविन पाण्डेले बताए । ‘होम डेलिभरी’का लागि बिरयानी अड्डाबाट चारजना राइडर खटिएका छन् ।
नाम अनुसार स्वादिस्ट बिरयानी र भारतीय परिकार पाइने सो चेन रेष्टुरेन्टमा बिरयानी बाहेक नेपाली स्वादिस्ट क्लासिक परिकारहरु पनि सर्भ गरिने संचालक बताउछन । अड्डामा भक्तपुरमा पाइने माटोको भाँडामा विरयानी पाक्छ । खानाका पारखीहरु माझ आफ्नो नाम राख्न सफल यस चेन रेष्टुरेन्टले मध्य बानेश्वर बाट शुरु गरेर हाल बालुवाटार र पेप्सीकोलास्थित मनोहरामा बिरयानी अड्डाले आफ्नो शाखा विस्तार गरेको छ । ३ वटा शाखामा ८२ जनालाई रोजगारी दिएको बताउँछन् सञ्चालक मध्येका राजन खनाल । खनाल भन्छन्– ‘कोभिड–१९ संक्रमणको बाबजुद शाखा विस्तार गर्दा नाफा कमाउन नसकेपनि सन्तुष्टि मिलेको छ ।’
युवा व्यवसायीले व्यवसायको नारा बनाएका छन्–‘देशले ठुलो गफ हैन, विदेशबाट फर्केको हर्के दाइको सीप खोज्दैछ ।’ ५ वर्षभित्र काठमाडौंमा ८ लगायत, काठमाडौंबाहिर १४ वटा बिरयानी अड्डाको नयाँ शाखा विस्तार गर्ने सोच र तयारी रहेको संचालकहरु बताउछन ।
