बिहिबार, साउन १०, २०८१

खाना पकाउने निहुँमा असईले कुटे जवान: जिउभरि निलडाम !


कान्तिपथ


नेपाली कांग्रेस महोत्तरीको अधिवेशनका लागि राखिएका अस्थायी प्रहरी पोष्टका प्रहरी इन्चार्जले आफ्ना एक प्रहरी जवानलाई कुटपिट गरेका छन् । जलेश्वर नगरपालिकास्थित सो अस्थायी प्रहरी पोष्टका इन्चार्ज असई मोतीराम महतोले खाना पकाउने विषयमा सोही प्रहरी पोष्टमा कार्यरत प्रहरी जवान जयनारायण पटेललाई निर्घात कुटपिट गरेका हुन् । शनिबार बिहान ९ बजेको समयमा आफूले खाना पकाईरहेको बेला असई महतो एक्कासी आएर कुटपिट गरेको पीडित प्रहरी जवान पटेलले सञ्चारकर्मीसँग कुरा गर्दै भने ।

‘नेपाली कांग्रेसको अधिवेशनमा खटेका प्रहरी पोष्टका प्रहरीको खानाका लागि होटलको कुपन उपलब्ध गराइएको थियो भन्ने कुरा आफूलाई थाहा थिएन,’ उनले भने, ‘भोक लागेपछि आफू खाना बनाइरहेको बेला एक्कासी क्याम्पमा आएर इन्चार्ज साबले गाली गलैज गर्दै कुटपिट गर्न थाले।’ उनले के कति कारणले कुटेको भन्ने सोध्ने मौका नै नदिई लट्ठी र मुक्काले कुटपिट गरेको बताएको इकागजले उल्लेख गरेको छ।

घटना सम्बन्धमा असई महतोले खानाको कुपनबारे प्रहरीलाई जानकारी गराइएपनि पटेलले होटलमा नगई पोष्टमै खाना पकाई रहेको देखेर कामको दवाब र तनावका कारण गाली गलौज र लट्ठीले हिर्काएको स्वीकार गरे। ‘जुन रुपमा बाहिर हल्ला फैलाइएको हो निर्घात कुटपिट गरियो, त्यस्तो छैन आवेशमा एक लट्ठी मात्रै हिर्काएको हुँ’, उनले भने।

‘खाना पकाउने ड्युटी प्रहरी जवान पटेलकै हो, तर समयमा खाना नबनाउने, बनाए पनि कम बनाउने गरेको कारण कयौं दिन आफूलाई भोकै सुत्नु परेको छ ।’ असई महतोले भने, ‘आफूलाई भोकै सुत्नु परे पनि उनलाई कहिल्यै केही भनेनौं, बरु जिल्लामा यो जवान चाहिदैन भन्ने मौखिक जानकारी गराइएपनि कुनै चासो लिइएको छैन।’

जलेश्वर नगरपालिकास्थित सो अस्थायी प्रहरी पोष्टमा हाल एक जना असई, २ हवल्दार र ५ जना प्रहरी जवानहरु कार्यरत रहेका छन्। उता प्रहरी उपरीक्षक कृष्ण प्रसाद पंगेनीले घटनाबारे जानकारी आफु कहाँ आएको बताए । ‘सगठनको आन्तरिक कुरा हो, हामी त्यस सम्बन्धमा बुझ्दैछौं, दोषी देखिएकालाई सांगठनिक कारवाही गरिनेछ।’



सूचना विभाग दर्ता नं. २७०८/०७७-७८

प्रबन्ध निर्देशक:

देवराज चौलागाई

सम्पादक:

जेविन सर्वहारा

लेखा:

विष्णु फुँयाल

आईटी:

प्रज्वल चौलागाईं

कान्तिपथ मिडिया प्रा. लि.


सम्पर्क

०१-५१४९१६०
इमेल: news.kantipath@gmail.com
ठेगाना: का.म.न.पा-३२, काठमाडौँ
© कान्तिपथ मिडिया प्रा. लि. सर्वाधिकार सुरक्षितत