मोरङको लेटाङमा एक प्रहीकाे मृत्यु हुनेगरी भएकाे झडपमा संलग्न आरोपमा प्रहरीले ६ जनालाई नियन्त्रणमा लिएको छ। आइतबार मोरङको लेटाङ–५ खेरुवास्थित शिक्षा विकास माविमा स्थानीयको आक्रमणबाट प्रहरी जवान उर्मिला श्रेष्ठको मृत्यु भएको हो।
घटना अनुसन्धानका लागि प्रहरीले ६ जनालाई पक्राउ गरेकाे मोरङ जिल्ला प्रशासन कार्यालयका सूचना अधिकारी महेशराज तिम्सिनाले जानकारी दिए। तर उनीहरुकाे परिचय प्रहरीले सार्वजनिक गरेको छैन।
सूचना अधिकारी तिम्सिनाले भने, ‘भर्खरै हो, ६ जना पक्राउ गरेको जानकारी मलाई आएको छ, सरकारी वकिल कार्यालयको समन्वयमा अदालतबाट म्याद थपेर अनुसन्धान सुरु हुन्छ।’
कोशी अञ्चल अस्पतालले महिला प्रहरी जवान उर्मिला श्रेष्ठको मृत्यु भएको घोषणा गरेको १ नं. प्रदेश प्रहरी कार्यालय, विराटनगरका एसपी नविन राईले बताए ।
यौन दुर्व्यवहार आरोपी लेटाङ नगरपालिका– ५ को शिक्षा विकास माध्यमिक विद्यालयका शिक्षक मनोज पौडेललाई पक्राउ गर्न पुगेको प्रहरी टोली र स्थानीयबीच आइतबार दिनभर झडप भएको थियो ।
त्यसक्रममा नेपाल प्रहरीको प्रदेश प्रहरी गणमा कार्यरत महिला प्रहरी जवान श्रेष्ठ गम्भीर घाइते भएकी थिइन् । उनको घाँटीमा गम्भीर चोट लागेको थियो ।
