नेकपा एमाले अध्यक्ष केपी शर्मा ओलीले दिल्लीस्थित नेपाली दूतावासमा लिम्पियाधुरासहितको नेपालको नयाँ नक्सा नराखेको भन्दै आपत्ति जनाएका छन् ।
‘सम्मानीय प्रधानमन्त्रीले प्रकाशित गरेको एक सय दिनको विवरणमा चुच्चे नक्सा हटाइयो । भौगोलिक अखण्डाप्रतिको यो खेलबाड के साधारण कुरा हो? ’ ओलीले भने, ‘हिजो मात्रै दिल्लीस्थित नेपालको दूतवासमा टाँगिएको फोटोमा त्यहाँ नेपालको बुच्चे नक्सा राखिएको छ, चुच्चे नक्सा हटाइएको छ । योभन्दा राष्ट्रिय दलाली र योभन्दा राष्ट्रको गौरव र शीर निहुर्याउने योभन्दा लज्जाजनक कुरा के हुन्छ ?’
ओलीले प्रधानमन्त्री देउवाको दिल्ली भ्रमणको उद्देश्यको बारेमा समेत प्रश्न गरेका छन् । ‘दिल्ली किन जानुभयो शेरबहादुरजी फर्किएर पछि सोधौंला भनेको थिएँ । यही राष्ट्रिय बेइमानीका लागि जान लाग्नु भएको हो ? के–का लागि जान लाग्नु भएको हो ?,’
एमालेनिकट नेपाल बुद्धिजिवी परिषद्को १० औँ राष्ट्रिय महाधिवेशनलाई सम्बोधन गर्दै उनले भने, ‘के यो साधारण कुरा हो ? भौगोलिक अखण्डताप्रतिको खेलवाड हो ।’
उनले चुनावको मुखमा प्रधानमन्त्री देउवा गएको विषयमा प्रश्न गर्दै भने,‘यही कुराका लागि जानुभएको हो दिल्ली ? केका लागि जानुभएको हो ?’ फर्किनुभन्दा अगाडि चुच्चेनक्सा राखेर आउने/नआउने विषयमा पनि उनले प्रधानमन्त्रीसँग जवाफ खेजेका छन् ।
