म्यानचेष्टर सिटीविरुद्ध शानदार पुनरागमन गर्दै स्पानिस क्लब रियल मड्रिड युरोपियन च्याम्पियन्स लिग फुटबलको फाइनलमा प्रवेश गरेको छ । बुधबार राति भएको सेमिफाइनलको दोस्रो लेगमा म्यानचेस्टर सिटीलाई ३-१ ले हराउँदै रियल फाइनल पुगेको हो ।
पहिलो लेगमा ४-३ ले पराजित भएको रियलले दोस्रो लेग जित्दै समग्रमा ६-५ खेल आफ्नो पक्षमा पारेको हो । सिटीले भने पहिलो लेगको आफ्नो अग्रता जोगाउन सकेन ।
रियलको मैदान सान्टियागो बर्नाबेउमा भएको दोस्रो लेगको खेलको ७३औं मिनेटमा रियाद महरेजले गोल गर्दै सिटीला अग्रता दिलाएका थिए । त्यसपछि सिटीले ६-४ को अग्रता बनाएको थियो ।
त्यसपछि रियलका रोड्रिगो चम्केपछि रियल खेलमा फर्किएको थियो। ९० औं मिनेटमा रियलका लागि बराबरी गोल गरेका रोड्रिगोले इन्जुरी टाईमको छैटौं मिनेटमा व्यक्तिगत दोस्रो गोल गर्दै रियललाई २-१ को अग्रता दिलाए ।
समग्रमा खेल ५-५ को स्थितिमा पुगेपछि खेलमा ३० मिनेटको अतिरिक्त समय थपिएको थियो। करिम बेन्जेमाले ९५औं मिनेटमा पेनाल्टीबाट गोल गर्दै रियललाई ३-१ को जित दिलाएका हुन् ।
अब रियलले च्याम्पियन्स लिगको उपाधिका लागि लिभरपुलको सामना गर्नेछ । फाइनल खेल मे २९ मा हुने तालिका रहेको छ।
