राप्रपा नेपालका केन्द्रीय कोषाध्यक्ष चन्द्रबहादुर गुरुङले कमल थापाको साथ छोडेका छन् । गुरुङले आज पार्टीको साधारण सदस्य समेत नरहने गरी कोषाध्यक्षबाट राजीनामा गरेका छन् । अध्यक्ष कमल थापालाई सम्बोधन गरेको राजीनामा पत्र गुरुङले आज केन्द्रीय कार्यालय विशालनगरमा दर्ता गराएका छन् ।
कमल थापा नेतृत्वको राप्रपाबाट यसअघि उपाध्यक्ष उद्धब पौडेलसहित केही नेताले समेत राजीनामा दिइसकेका छन् । राजेन्द्र लिङ्देनसँग राप्रपा अध्यक्षमा पराजित भएपछि थापाले सो पार्टी छाडेर राप्रपा नेपाल गठन गरेका थिए । तर, उनको पक्षमा देशव्यापी कार्यकर्ताको साथ नभएपछि नेताहरू धमाधम छाड्दै राप्रपातिर फर्किने तयारीमा देखिएका छन् ।
पाँच दिनअघि राप्रपा नेपालका केन्द्रीय उपाध्यक्ष उद्धव पौडेल, केन्द्रीय सदस्यहरू उर्मिला अधिकारी र श्रीधर सुवेदीले पनि थापाको साथ छाड्दै पार्टीबाट राजीनामा दिएका थिए । गुरुङ कमल थापा राष्ट्रवादी स्वतन्त्र विद्यार्थी मण्डलका अध्यक्ष हुँदादेखिका सहकर्मी थिए । २०३८ सालमा थापा नेपाल युवक सङ्गठनका अध्यक्ष रहँदा गुरुङ उपाध्यक्ष थिए । गुरुङ २०७३ मा आदिवासी जनजाति प्रतिष्ठानका उपाध्यक्ष समेत भएका थिए ।
