शुक्रबार, जेष्ठ ६, २०७९

सर्लाहीका १४ पालिका प्रमुखमा महिला उम्मेदवार


कान्तिपथ


सर्लाही, २३ वैशाख यही वैशाख ३० गते हुने स्थानीय तहको निर्वाचनका लागि सर्लाहीबाट १४ महिलाले अध्यक्ष वा प्रमुख पदमा उम्मेदवारी दिएका छन् ।

मुलुककै सबैभन्दा बढी अर्थात २० स्थानीय तह रहेको जिल्लामा विभिन्न राजनीतिक दलबाट आठ र ६ स्वतन्त्र गरी १४ महिलाले अध्यक्ष वा प्रमुख पदमा उम्मेदवारी दिएका हुन् । नेपाली कांग्रेस, नेकपा (एमाले), नेकपा (माओवादी केन्द्र), जनमत पार्टी, राप्रपा, राष्ट्रिय सद्भावना पार्टी र नेपाल सद्भावना पार्टीले स्थानीय तहका अध्यक्ष वा प्रमुख पदमा महिलालाई उम्मेदवार बनाएको छ । नेकपा एमालेबाट तीन तथा नेपाली कांग्रेस, नेकपा (माओवादी केन्द्र), जनमत पार्टी, राप्रपा, राष्ट्रिय सद्भावना पार्टी र नेपाल सद्भावना पार्टीबाट एक–एक महिलालाई पालिकाको अध्यक्ष वा प्रमुख पदमा उम्मेदवार बनाएको हो ।

नेकपा (एमाले)ले ५४ वर्षीया कल्पना कटुवाललाई बरहथवा नगरपालिकाको प्रमुख पदको उम्मेदवार बनाएको छ । यसअघि विसं २०७४ को निर्वाचनमा पनि सो पालिकाको प्रमुख पदमा एमालले कटुवाललाई उम्मेदबार बनाएको थियो । कटुवालले त्यसबेला चार हजार ८०७ मत ल्याएर तेस्रो स्थान प्राप्त गर्नुभएको थियो । त्यतिबेला माओवादी केन्द्रबाट नगर प्रमुखका उम्मेदवार देवानन्द महतोले सात हजार ३०८ र कांग्रेसका निरञ्जनप्रसाद दासले पाँच हजार २७ मत प्राप्त गर्नुभएको थियो । यस पटक कटुवालले निवर्तमान नगर प्रमुख माओवादी केन्द्रका महतो र कांग्रेसका विगु चौधरीसँग प्रतिस्पर्धा गर्नुपर्ने छ ।

त्यस्तै एमालेले चन्द्रनगर गाउँपालिकाको अध्यक्षमा सङ्गीतादेवी महतो नुनिया र ब्रह्मपुरी गाउँपालिकाको अध्यक्षमा रीता कुमारीलाई उम्मेदवार बनाएको छ । चन्द्रनगर गाउँपालिकामा एमालेले अध्यक्ष र उपाध्यक्ष दुवै पदमा महिलालाई नै उम्मेदवार बनाएको छ । एमालेले चन्द्रनगर गाउँपालिका उपाध्यक्षमा दलित समूहबाट राजन्ती पासवानलाई उम्मेदवार बनाएको छ । पहिलो पटक चन्द्रनगर गाउँपालिकामा अध्यक्षको उम्मेदवारी दिएकी ३३ वर्षीया सङ्गीताले लोसपाबाट उठेका निवर्तमान अध्यक्ष महेन्द्र महतो सुडी, कांग्रेसका राजकुमार महतो, माओवादी केन्द्रका लोकेन्द्र मुखिया, जसपाका सुधीरकुमार यादव, जनमत पार्टीका किशोरी महतो सुडीलगायतसँग प्रतिस्पर्धा गर्नुपर्ने छ ।

त्यसैगरी एमालेबाट ब्रह्मपुरी गाउँपालिकाको अध्यक्षमा उम्मेदवारी दिएकी ३८ वर्षीया रीता कुमारीले लोसपाबाट उठेका निवर्तमान अध्यक्ष विनोदकुमार साह, कांग्रेसका रामपदारथ साह, जसपाका वीरेन्द्रकुमार राय, माओवादी केन्द्रका कृष्णा राय, जनमत पार्टीका शैलेन्द्र कुशवाहा, बहुजन एकता पार्टी नेपालका देवेन्द्र रामलगायतसँग प्रतिष्पर्धा गर्नुपर्ने छ ।

त्यस्तै माओवादी केन्द्रले गोडैता नगरपालिकाको प्रमुखमा अनिता देवीलाई उम्मेदवार बनाएको छ । उहाँले २०७४ सालको निर्वाचनमा पनि सोही पदमा दुई हजार ३९७ मत ल्याउनुभएको थियो । त्यहाँ तत्कालीन राजपाबाट निवर्तमान नगर प्रमुख देवेन्द्रकुमार यादवले तीन हजार ९०२ तथा कांग्रेसका उपेन्द्रप्रसाद कुशवाहाले तीन हजार ६७४ मत प्राप्त गर्नुभएको थियो । उहाँले यो पटक पनि यसअघिका निर्वाचित नगर प्रमुख लोसपाका यादव, कांग्रेसका कुशवाहालगायतसँग नै प्रतिस्पर्धा गर्नुपर्ने भएको छ ।

त्यसैगरी कौडेना गाउँपालिकामा जनमत पार्टीबाट ३१ वर्षीया सावित्री धिताल तथा राष्ट्रिय सद्भावना पार्टीबाट ५१ वर्षीया अर्चनादेवी गिरीले अध्यक्षमा उम्मेदवारी दिनुभएको छ । उहाँहरुले निवर्तमान अध्यक्ष लोसपाका रामप्रसाद राय यादव, कांग्रेसका रुपेशकुमार, जसपाका राज नन्दनप्रसाद, माओवादी केन्द्रका महादेव साह, एमालेका श्यामप्रसाद चौधरी कलवारलगायतसँग प्रतिस्पर्धा गर्नुपर्ने छ । त्यसैगरी हरिवन नगरपालिकामा नेपाल सद्भावना पार्टीबाट ५५ वर्षीया बचवीदेवी साह तेली र राष्ट्रिय प्रजातन्त्र पार्टीबाट ६५ वर्षीया राधाकुमारी बरालले हरिपुर नगरपालिकाको प्रमुखमा उम्मेदवारी दिनुभएको छ । हरिवनकी तेलीले निवर्तमान नगर प्रमुख एमालेका गणेश प्रसाद प्रसाईं कांग्रेसका रामप्रसाद मैनाली, माओवादी केन्द्रका रमेश बुढाथोकी (कमल), नेकपा(एकीकृत समाजवादी)का सुरेन्द्र लामालगायतसँग प्रतिस्पर्धा गर्नुपर्ने छ भने हरिपुरकी बरालले निवर्तमान मेयर एकीकृत समाजवादीका जमिरुद्धिन मंसुर, कांग्रेसका गोपाल पञ्जीयार, एमालेका यादव सरकार, माओवादी केन्द्रका सुनिल बुढाथोकी, लोसपाका रामचन्द्र साह, जनमतका राजेन्द्ररायलगायत उम्मेदवारसँग प्रतिस्पर्धा गरिरहनुभएको छ । 

त्यस्तै बागमती नगरपालिकाको प्रमुख पदमा ४३ वर्षीया धनकुमारी खड्का पौडेलले स्वतन्त्र उम्मेदवारी दिनुभएको छ । जिल्लामा उहाँसहित छ महिलाले पालिका प्रमुखको रुपमा उम्मेदवारी दिनुभएको हो । पालिका प्रमुखमा छ स्वतन्त्रसहित १४ जना तथा उपप्रमुखमा भने २० जना स्वतन्त्रसहित १४१ जना महिलाले उम्मेदवारी दिनुभएको मुख्य निर्वाचन अधिकृतको कार्यालय सर्लाहीले जनाएको छ ।

सर्लाहीमा कूल चार लाख ७४ हजार ४३९ मतदाता रहेका छन् । तीमध्ये दुई लाख ५७ हजार १३८ पुरुष तथा दुई लाख १७ हजार २९२ महिला र नौ जना तेस्रो लिङ्गी मतदाता रहेका जिल्ला निर्वाचन कार्यालय सर्लाहीले जनाएको छ । करिब आधा मतदाता महिला भए पनि उम्मेदवारको रुपमा महिलालाई अगाडि बढाउन भने प्रमुख राजनीतिक दलहरुले कञ्जुस्याइँ गर्दै आएको पाइएको छ ।
सूचना विभाग दर्ता नं. २७०८/०७७-७८

अध्यक्ष:

विमल ढुंगेल

प्रबन्ध निर्देशक:

देव चौलागाईं

सम्पादक:

जेविन सर्वहारा

मार्केटिङ्ग:

विनोद घिमिरे

लेखा:

विष्णु फुँयाल

आईटी:

प्रज्वल चौलागाईं

फोटो/भिडियोग्राफर :

रामकाजी बस्नेत

कान्तिपथ मिडिया प्रा. लि.


सम्पर्क

०१-५१४९१६०
इमेल: news.kantipath@gmail.com
ठेगाना: का.म.न.पा-३२, काठमाडौँ
© कान्तिपथ मिडिया प्रा. लि. सर्वाधिकार सुरक्षितत