बुधबार, फाल्गुन १६, २०८०

मतदाता भन्छन् : ‘हाम्रालाई होइन, राम्रालाई रोजौँ’


कान्तिपथ


रामपुर (पाल्पा), २५ वैशाख वैशाख ३० गते हुने स्थानीय तहको निर्वाचन आउन पाँच दिन मात्रै बाँकी छ । आसन्न स्थानीय तहको निर्वाचनले मुलुकमा निर्वाचन–उल्लासयुक्त बातावरण बनेको छ । निर्वाचनको मिति नजिकिँदै जाँदा विभिन्न दलका उम्मेदवार आफ्नो पक्षमा मतदान गर्न मतदाताको घरदैलोमा पुगिरहेका छन् । मतदाता भने विकासप्रेमी, सक्षम उम्मेदवारलाई मतदान गर्ने पक्षमा देखिन्छन् ।

विगतका निर्वाचनमा कुनै राजनीतिक दलका पक्षमा रहेर मतदान गरेका मतदाता अब गाउँको विकासका लागि दलगत स्वार्थभन्दामाथि रहेर काम गर्ने उम्मेदवारलाई छनोट गरी मतदान गर्ने बताउँछन् । “विभिन्न राजनीतिक दलका उम्मेदवार आफ्नो पार्टीको पक्षमा मतदान गर्न आह्वानसहित गाउँमा आउने गरे पनि उम्मेदवार हेरेर मात्रै मतदान गर्ने बताउनुहुन्छ”, रामबहादुर राना ।

“गाउँमा विकास हुनुप¥यो, हामी जनताले विकास अभावमा निकै समस्या भोग्नु परेको छ, अब पनि हामी पार्टीभन्दा माथि उठेर हाम्रालाई होइन राम्रालाई रोज्नुपर्छ, यसो गरिएन भने विकासले गति लिन सक्दैन, हामीलाई चाहिएको विकास हो”, उहाँले भन्नुभयो । 

चुनावको सरगर्मीले यतिबेला बाटो, सभासमारोह, धनी–गरिब, अशक्तका घरदेखि चिया पसल र विभिन्न समाजिक सञ्जालमा सक्षम र योग्य उम्मेदवारका पक्षमा मतदान गर्ने सम्बन्धमा मतदाताले आफ्ना विचार राखिरहेका छन् । गाउँघरमा नागरिक शिक्षित र सचेत हुँदै जाँदा कुनै दलको पार्टी कार्यकर्ता भएर मतदान गरेका नागरिक अब सक्षम र योग्य उम्मेदवारलाई मतदान गर्नुपर्ने उनीहरुको तर्क चलिरहेको पाइन्छ । 

मतदाता आफँै ‘हाम्रालाई होइन, राम्रालाई मतदान’ गर्न चुनावी प्रचारप्रसारका व्यस्त देखिएका छन् । राजनीतिक दलले आ–आफ्नै ढङ्गले गाउँघरमा चुनावी अभियान तथा घरदैलो कार्यक्रम गरे पनि यहाँका मतदाता भने गाउँ छिमेकमा हाम्रालाई नहेरी राम्रालाई मतदान गर्न चुनावी माहोलमा जुटेका छन् ।

राम्रा व्यक्तिलाई मतदान गर्ने अधिकार मतदातालाई छ । कसैको पनि प्रलोभनमा नपरी आफूले योग्य ठानेको राम्रा व्यक्तिलाई मतदान गरियो भने गाउँमै सबै कुराको सुख सुविधा हुने ज्येष्ठ नागरिक तिलकुमारी उपाध्याय बताउनुहुन्छ । उहाँ भन्नुहुन्छ, “यसभन्दा अघि पनि धेरैपटक मतदान गरियो, यहाँबाट निर्वाचन जितेपछि नेता शहर पस्ने गर्दा गाउँको विकास भएन, अहिले स्थानीय सरकार आएपछि विकासको ढोका खोलिएको छ, अबको निर्वाचनमा जनताको मन जितेर काम गर्ने उम्मेदवारलाई मतदान गर्नेछौँ ।” 

गाउँको विकास चाहने हो भने पार्टी नहेरी व्यक्ति हेरेर भोट हाल्ने मतदाताले ‘हाम्रालाई होइन राम्रालाई रोजौँ’ यी विषयमा जान्नु र बुझ्नु आवश्यक रहेको उनीहरु बताउँछन् । नेतृत्व सम्हालेपछि कतिपयले आफ्ना कार्यकर्तालाई मात्रै विभिन्न योजनाका काम सुम्पने, उपभोक्ता समितिमा आफू निकटका व्यक्तिलाई स्थान दिँदा गाउँमा सोँचेअनुसारको काम नभएको युवा प्रदीप पाण्डेयले बताउनुभयो ।

“निर्वाचनमा कुनै दलको उम्मेदवार भए पनि चुनाव जितेपछि सबैको साझा व्यक्ति बन्नुपर्छ, सबैलाई समेटेर लैजानसक्ने नेतृत्वको खाँचो छ, विकास निर्माण तथा विभिन्न योजनाका काममा आफू निकटका व्यक्ति, कार्यकर्तालाई मात्रै समेट्दा काममा पारदर्शिता पनि हुँदैन”, उहाँले भन्नुभयो ।

निर्वाचनको समयअगावै मतदातासमक्ष विभिन्न आश्वासन बाँड्ने र नेतृत्वमा पुगेपछि सो आश्वासन पूरा नगर्ने परिपाटी नेतृत्वमा देखिएको स्थानीय बताउँछन् । साथै, यहाँका मतदाताले झुठो र बोलेका कुरा पूरा गर्न नसक्ने आश्वासन नदिन अनुरोध गरेका छन् । 

सामान्य भौतिक पूर्वाधार पनि खडा हुन नसकेको गाउँमा विदेशी देशसँग तुलना गरेर विशाल सहर बनाउने योजना लिएर चुनावका बेलामात्र मतदातासँग हात नजोड्न उनीहरुको अपिल छ । चुनाव नजिकिँदै गर्दा र यससम्बन्धी माहोल खडा भइरहँदा गाउँगाउँमा मुखले राम्रोका पक्षमा भाषण गरेको देखाउँदै जनतालाई भोज भतेरदेखि विभिन्न प्रलोभनमा पार्दै हाम्रालाई जिताउन विभिन्न दलका नेता कार्यकर्ता कम्मर कसेर लागेको देखिन्छ । 


सूचना विभाग दर्ता नं. २७०८/०७७-७८

प्रबन्ध निर्देशक:

देवराज चौलागाई

सम्पादक:

जेविन सर्वहारा

लेखा:

विष्णु फुँयाल

आईटी:

प्रज्वल चौलागाईं

कान्तिपथ मिडिया प्रा. लि.


सम्पर्क

०१-५१४९१६०
इमेल: news.kantipath@gmail.com
ठेगाना: का.म.न.पा-३२, काठमाडौँ
© कान्तिपथ मिडिया प्रा. लि. सर्वाधिकार सुरक्षितत