काठमाडौं महानगरपालिकामा मतगणना कार्य निकै सुस्त भएको चौतर्फी आलोचना भैरहेको छ । हालसम्म महानगरपालिकामा झन्डै साढे ६ हजार मतगणना भएको छ । ढिलो गतिमा मत गणना भएको भन्दै सामाजिक सञ्जाल प्रयोगकर्ताहरूले विभिन्न किसिमका ट्रोल बनाउन तथा व्यङ्ग्य गर्न थालेका छन् ।
मतदानको भोलीपल्ट बैशाख ३१ गते बिहान ९ बजेदेखि सुरु भएको मतगणना हालसम्म २८ घण्टामा जम्मा ६ हजार ४ सय ७३ मत मात्र गणना भएको छ।
यो हिसावले एक घण्टामा २ सय २८ वटा मत गणना भएको देखिन्छ । काठमाडौं महानगरपालिकामा १ लाख ९१ हजार मत खसेको छ । अहिले भइरहेको दरमा मत गणना हुने हो भने खसेको कुल मत गन्न ८ सय ३५ घण्टा लाग्ने देखिन्छ, यो भनेको झन्डै ३४ दिनको समय हो ।
कूल ३ लाख २ सय ४२ मतदाता रहेको काठमाडौं महानगरमा ६३ प्रतिशत मत खसेको थियो । अघिल्लो निर्वाचन २०७४ सालमा महानगरको मतगणना सम्पन्न गर्न २ साता लागेको थियो ।
