इन्डियन प्रिमियर लिग (आईपीएल) टी-२० क्रिकेट प्रतियोगितामा गए राति भएको खेलमा दिल्ली क्यापिटल्सलाई मुम्बई इन्डियन्सले पाँच विकेटले हराउँदा बेंगलोरले प्लेअफमा स्थान बनाएको छ । शनिबार राति पराजित दिल्ली र विजयी मुम्बई दुबै प्लेअफबाट टाढा रहे । तर यो नतिजासँगै मैदान बाहिर रहेको बेंगलोर प्लेअफमा स्थान बनायो ।
मुम्बईको जीतसंगै रोयल च्यालेंजर्स बेंगलोर र उनीहरुका समर्थकहरुका तर्फबाट मुम्बई इन्डियन्सको टिमलाई सामाजिक संजालमा धन्यवादको ओइरो लागेको छ ।
योसँगै आईपीएको प्लेअफ समीकरण पनि पूरा भएको छ। पहिलो क्वालिफायरमा गुजरात टाइटन्स र राजस्थान रोयल्स भिड्नेछन् । एलिमिनेटरमा लखनउ सुपर जाइन्ट्स र बेंगलोरले प्रतिस्पर्धा गर्नेछन् ।
यसअघि दिल्लीले दिएको १६० रनको लक्ष्य मुम्बईले १९ ओभर १ बलमा ५ विकेट गुमाएर पूरा गरेको थियो । मुम्बईका इशान किशनले ४८ रन जोडे । दिल्लीका सार्दुल ठाकुर र एन्रिच नोर्कियाले २/२ विकेट लिए ।
सुरुआती ब्याटिङ गरेको दिल्लीले २० ओभरमा ७ विकेट गुमाएर १५९ रन जोडेको थियो । दिल्लीका रोभमान पावेलले ४३ रन जोडेका थिए । मुम्बईका लागि जस्प्रित बुम्राहले सर्वाधिक ३ विकेट लिए ।
