सिरहामा धारिलो हतियारको प्रयोग गरी बाबु छोराको हत्या भएको छ । घरमै सुतिरहेको अवस्थामा सिरहाको अर्नमा गाउँपालिका–१ महनौरका ६० वर्षीय चुलाहाइ भन्ने चन्देश्वर पाल र उनको १९ वर्षीय छोरा सन्तकुमार पालको शनिबार राति हत्या गरिएको हो ।
सन्तकुमारको यहि ११ जेठमा विवाह हुने भएकाले गाउँले महिलाहरू विवाह गीत गाएर १२ बजे सुतेका बाबुछोराको करिब २ बजे राति हत्या भएको स्थानीय अरुण सिंहले जानकारी दिए । उनका अनुसार राति करिव १२ बजेसम्म गीत बजिरहेको थियो । विहानपख करिब २ बजेको आसपासमा घटना भएको हुनसक्ने जिल्ला प्रहरी कार्यालयले जानकारी दिएको छ।
घरको छुट्टाछुट्टै कोठामा सुतेका बुबा र छोराको धारिलो हतियार प्रहार गरी हत्या गरेको अवस्थामा शव फेला परेको प्रहरीले बताएको छ । बुवा एक्लै सुतेको र सन्तकुमारसँग गाउँकै १०/१२ वर्षको एक जना बालक सुतेका थिए । उनले नै हत्या भएको थाहा पाएपछि घरका अन्य सदस्यलाई र गाउँलेलाई जानकारी गराएका थिए ।
घटनाको जानकारी पाएलगत्तै करिब बिहान ४ बजे प्रहरी घटनास्थलमा पुगेको थियो । प्रहरीले घटनास्थलमा अनुसन्धानका लागि तालिम प्राप्त कुकुरको पनि सहयोग लिएको थियो। घटना बारे अनुसन्धान भइरहेको प्रहरीले बताएको छ । दुवै जनाको शवलाई पोष्टमार्टमका लागि जिल्ला अस्पताल सिरहामा राखिएको छ ।
