पार्टी अध्यक्ष रवीन्द्र मिश्रले पदबाट राजीनामा दिएपछि विवेकशील साझा पार्टी अध्यक्षविहीन बनेको छ । मिश्रले यही वैशाख ३० गते भएको स्थानीय तह निर्वाचनमा पार्टीले अपेक्षित नतिजा नल्याएको भन्दै बुधबार नैतिकताको आधारमा राजीनामा दिएका छन् ।
मिश्रले राजीनामा दिए पनि फिर्ता लिन अनुरोध गरिने पार्टीका एक सदस्यले बताए । पार्टीका नेता प्रकाशचन्द्र परियारले भने केन्द्रीय कार्यसम्पादन समितिको बैठक बसेर निर्णय लिइने बताए । “अहिले कार्यवाहक कसैलाई दिएको अवस्था छैन । हामी केन्द्रीय कार्यसम्पादन समिति बैठक बस्ने तयारीमा छौँ,” उनले भने, “४८ घण्टाभित्र निर्णय लिइसक्छौँ ।”
मिश्रलाई राजीनामा फिर्ता लिन अनुरोध गर्ने तयारी हो ? भन्ने प्रश्नमा परियारले बैठकअगाडि केही भन्न नसकिने बताए ।
