आर्थिक अनियमितताको आरोपमा सशस्त्र प्रहरी बल दोलखाका डीएसपी बुद्धिनारायण महर्जनलाई हल्चोक हेडक्वार्टर तानिएको छ । स्रोतका अनुसार डीएसपी बुद्धिनारायण महर्जनलाई जिल्ला प्रमुखको रुपमा रहँदा धेरै सशस्त्र प्रहरी बलका कर्मचारीलाई बिदा दिएर रासनमा अनियमितता गरेको आरोप लागेको छ ।
उनले जिल्लामा रहेका सशस्त्र प्रहरीका जनशक्तिको आधा हिस्सालाई एकैपटक बिदा दिएर रासनबाट आएको पैसा अनियमितता गरेको आरोप लागेको हो । चुनावमा सवारीसाधन भाडामा लिँदासमेत अनियमितता गरेको भन्दै उनलाई सशस्त्र प्रहरी प्रधान कार्यालयमा तानिएको हो ।
अहिले उनको ठाउँमा डीएसपी सुरज कार्कीलाई पठाइएको छ । अनियमितता गरेको भन्दै उनीविरुद्ध दर्जनौँ उजुरी छन् । स्थानीय स्तरमा उनलाई कांग्रेसलाई बुथ हान्न सघाएको आरोप पनि छ । उनी कमजोर कमाण्ड क्षमता भएका अधिकृतका रुपमा चिनिन्छन् ।
