सप्तरीमा सशस्त्र प्रहरी सहायक निरीक्षकको हत्या अभियोग लागेका जवान होमबहादुर खत्री पुर्पक्षका लागि कारागार चलान भएका छन्। सँगै कार्यरत प्रहरी सहायक निरीक्षक सत्यनारायण यादवको हत्यामा संलग्न अभियोगमा खत्रीलाई जिल्ला अदालत सप्तरीले पुर्पक्षका लागि थुनामा पठाएको हो।
गत असोज १९ गते साँझ जवान खत्रीले असई यादवको हत्या गरेको अभियोग छ। असई यादवको शव दुई दिनपछि भारतको बिहार राज्य मधुवनी जिल्ला जिरोगा ग्रामपञ्चायत वडा नं ९ स्थित घोडदह नदीमा फेला परेको थियो। जवान खत्रीले असोज १८ गते साँझ साढे ७ बजेतिरै उनको हत्या गरेर शव खोलामा फालेको खुलेको छ। असोज २० गते दिउँसो साढे २ बजेतिर असई यादवको शव खोला किनारमा फेला परेको थियो।
सुरुमा जवान खत्रीले कुटपिट गरी असईलाई घाइते बनाएको र पछि डोरीले कसेर हत्या गरेको खुलेको प्रहरीको दाबी छ। हत्यापछि सशस्त्र प्रहरी पोस्टनजिकै रहेको खोलामा शव फालिदिएका थिए। होमबहादुर खत्री २०६३ फागुन २६ गते सशस्त्र प्रहरी जवानमा भर्ना भएका थिए।
