त्रिभुवन विश्वविद्यालयले स्नातक अन्तिम वर्षको परिक्षाफ़ल सार्वजनिक नहुँदै स्नातकोत्तर प्रथम सेमेस्टरमा भर्ना खुलेको सूचना प्रकाशित गरेको छ । त्रिविका विविध संकायअन्तर्गतका क्याम्पसहरूमा शैक्षिक वर्ष २०७९/०८० का लागि स्नातकोत्तर तह प्रथम सेमेस्टरमा नयाँ भर्ना खुलेको सूचनामा उल्लेख थियो ।
त्रिविले प्रकाशित गरेको सूचनामा स्नातकोत्तर प्रथम सेमेस्टरमा भर्ना हुन आवेदन फारम बुझाउने म्याद पुस ६ देखि माघ ५ गतेसम्म तोकिएको छ । प्रवेश परीक्षाका लागि भने सम्बन्धित डिनको कार्यालयले निर्धारण गरेअनुसार हुने भनिएको छ । कक्षा सञ्चालन माघ २२ गतेदेखि हुने सूचनामा उल्लेख छ ।
त्रिविको यो सूचनाले स्नातक तह अन्तिम वर्षको नतिजा कुरिरहेका विद्यार्थीहरु अन्योलमा परेका छन् । स्नातकको नतिजा सार्वजनिक नगरी स्नातकोत्तर तहको भर्ना खुलाएकोमा उनीहरु अलमलमा परेका हुन् ।
त्रिविले गत वर्ष माघमा गराएको बीबीएस चौथो वर्ष र बिए तेश्रो वर्षको नजिता अझै निकालेको छैन । परीक्षा भएको १ वर्ष बितिसक्दा पनि रिजल्ट नआएपछि विद्यार्थीहरु मारमा छन् । कोभिड १९ का कारण परीक्षा एक वर्ष ढिलो भएको थियो ।
बीएड चार वर्षको र बीएस्सी चौथो वर्षको पनि नजिता आएको छैन ।
