विराटनगर : चार वर्षभन्दा लामो समयदेखि बिग्रिएर थन्किएको विराटनगर महानगरपालिकाको सफाइ मेसिन ब्रुमर मर्मतपछि सञ्चालनमा ल्याइएको छ ।
मर्मतपछि ब्रुमरबाट बुधबार कञ्चनबारी चोकदेखि नहरसम्मको सडक सफाइ गरिएको छ । ब्रुमरले सफा गरेपछि दमकलबाट सडक पखालिएको थियो । विराटनगरलाई सफा, सुन्दर, व्यवस्थित र विकसित बनाउने मेयर नागेश कोइरालाको योजना अन्तर्गत महानगरका मुख्य र बढी आवतजावत हुने सडक पखाल्ने काम भइरहेको छ ।
मंगलबार एयरपोर्ट रोड पखालिएको थियो । ब्रुमरबाट महानगरका मुख्य सडकको धुलो बढारिनेछ । बिग्रिएर लामो समय थन्किएका कारण मर्मत गरेर परीक्षण गरिएको प्रमुख प्रशासकीय अधिकृत विष्णुप्रसाद कोइरालाले बताए ।
२०७५ साल असोजमा महानगरपालिकाले ५५ लाख रूपैयाँमा सो ब्रुमर खरिद गरेको थियो ।
