बागलुङ, पुस १२ गते । बागलुङका तीन स्थानीय तहमा दश वटा झोलुङ्गे थपिएका छन् । गत आर्थिक वर्ष २०७८/०७९ मा ढोरपाटन नगरपालिकाकामा तीन, बरेङ गाउँपालिकामा दुई, ताराखोला गाउँपालिकामा पाँच गरी दश वटा पुल निर्माण गरिएको हो ।
गत वर्ष निर्माण सम्पन्न गर्ने गरी कुल ३३ वटा पुलको सर्भे गरिएको थियो । सर्भे गरिएको ३३ वटा मध्ये १० वटा सम्पन्न भएको र अन्य निर्माणधिन रहेको स्थानीय व्यवस्थापन संस्था विवाईसी बागलुङका झोलुङगे पुल कार्यक्रम संयोजक प्रेम केसीले जानकारी दिनुभयो ।
ढोरपाटन नगरपालिका–२ सिमलचौर घाट, ढोरपाटन नगरपालिका–७ का पँधेरी घाट र ढोरपाटन नगरपालिका–९ को रासीबाङ्ग घाट, बरेङ गाउँपालिका–२ को काउलाघाट, बरेङ गाउँपालिका–१ को दोभानखोला घाट , ताराखोला गाँउपालिका – २ को दोभानघाट , ताराखोला–३ को निस्दीखोला घाट, ताराखोला–३ को सादीघाट, ताराखोला–४ को दोगाडी घाट र ताराखोला–५ को मैन पकाउने घाट खोलामा पुल निर्माण गरिएको छ ।
संघीय मामिला तथा सामान्य प्रशासन मन्त्रालय, झोलुङ्गे पुल क्षेत्रगत कार्यक्रम अन्तर्गत स्थानीय तहले पुलको योजना छनोट र कार्यान्वयन गर्छ । नेपाल सरकार र स्वीस सरकारबीचको सम्झौता अनुसार पुल निर्माण गर्न बागलुङमा झोलुङ्गे पुल सहयोग एकाई (टिविएसयु) र पिटिएपि पोखराले प्राविधिक सहयोग गर्दै आएको छ ।
टिविएसयुले पुलको लठ्ठा, फलामै सामग्रीको व्यवस्थापन र वितरणमा स्थानीय तहसँग समन्वय गरेर काम गर्छ । कार्यक्रम संयोजक केसीका अनुसार १२० मिटरसम्मका पुल उपभोक्ता समिति र त्यसभन्दा लामा पुल निर्माण व्यवसायीमार्फत् बनाउने गर्छ ।
संघीय सरकारले पुल निर्माणको लागि सशर्त बजेट उपलब्ध गराउँछ । कुल बजेट मध्ये पुल क्षेत्रगत कार्यक्रमको ८५ प्रतिशत, स्थानीय तहको १३ प्रतिशत लगानी र २ प्रतिशत जनश्रमदानको प्रावधान रहेको केसीले जानकारी दिनुभयो ।
जिल्लामा पुल रणनीति २०६२ अनुसार पुल निर्माणको काम भइरहेको छ । विस २०७६ भदौसम्म जिल्लाभर ४५३ वटा पुल छन । चालु आर्थिक बर्षमा २५ वटा पुल निर्माण गरिने कार्यmम संयोजक केसीको भनाइ छ । सबै पुलको गत सर्भे गरिएको थियो ।
बागलुङ नगरपालिकामा दुई, काठेखोला गाउँपालिकामा तीन, ताराखोला गाउँपालिकामा तीन, निसीखोला गाउँपालिकामा पाँच, ढोरपाटन नगरपालिकामा सात र जैमिनी नगरपालिकामा पाँच वटा पुल निर्माण हुनेछन् ।
देवराज चौलागाई
०१-५१४९१६०
इमेल:kantipath24@gmail.com
ठेगाना: का.म.न.पा-३२, काठमाडौँ