काठमाडौँ । राष्ट्रियसभाका सांसदहरुले संविधान र ऐनले व्यवस्था गरेका सबै संरचनाहरूको गठन गरि प्रभावकारी रुपमा कार्यान्वयन गरिनुपर्नेमा जोड दिनुभएको छन् ।
राष्ट्रियसभाको राष्ट्रिय सरोकार तथा समन्वय समितिको सघीय संसद् सचिवालय सिंहदरबारमा आज बसेको बैठकमा सांसदहरुले संघ, प्रदेश र स्थानीय तहबीच समन्वय नहुँदा प्रभावकारी रुपमा सेवा प्रदान गर्न नसकिएको बताउनुभएको हो ।
सांसदहरु राज्यलक्ष्मी गैरे, शेखरकुमार सिंह, तुलसा दाहाल लगायतले प्रदेश र स्थानीय तहले कानून बनाउँदा आपसमा बाझिने गरेको बताउनुभयो ।
बैठकमा अधिवक्ता मोहनलाल आचार्यले संघ, प्रदेश र स्थानीय तहको अन्तर सम्बन्धबारे कार्यपत्र प्रस्तुत गर्दै तीनै तहको सरकारको संयुक्त लगानीमा योजना तर्जुमा र कार्यान्वयन हुन नसकेको, न्यायालय र न्यायिक समितिबीच समन्वय हुन नसकेको, कुन आयोजना कसले सञ्चालन गर्ने भनेर स्पष्ट हुन नसकेको र मन्त्रालयहरूले स्थानीय तहसँग साझेदारी नगरेका कारण समस्या आएको बताउनुभयो ।
उहाँले मुलुक सङ्घीयतामा गइसकेपछि जिल्लामा रहेका सम्पूर्ण संरचनाहरू राखेर गर्नुपर्ने र राष्ट्रिय योजना आयोग खारेज गरी प्राकृतिक स्रोत तथा वित्त आयोगलाई अधिकार सम्पन्न बनाइनुपर्ने, कानून निर्माण गर्न तीन तहबीच समन्वय हुने गरी साझा दिग्दर्शन बनाइनुपर्ने लगायतका सुझाव दिनुभयो ।
