मेलम्ची । नेकपा एकिकृत समाजवादी सिन्धुपाल्चोकले नयाँ नेतृत्व चयन गरेको छ । शनिवार भएको जिल्ला अधिवेशनबाट ७ जना पदाधिकारी सहित ८५ सदस्यीय कमिटी निमार्ण गरिएको नेकपा एकिकृत समाजवादीका जिल्ला कमिटी सदस्य रामभक्त दनुवारले जानकारी दिनुभयो ।
अधिवेशनबाट जिल्ला अध्यक्षमा नवराज पौडेल, उपाध्यक्षमा छिरिङ ग्याल्बु लामा र अनिता लामा सचिवमा दीपक नेपाल चयन हुनुभएको छ । त्यस्तै उपसचिवमा कुमार राज घतानी, नरेन्द्र खड्का र रवि भण्डारी चयन हुनुभएको हो । अधिवेशनको उद्घाटन केन्द्रिय अध्यक्ष माधव कुमार नेपालले गर्नुभएको थियो । उद्घाटन सत्रलाई सम्बोधन गर्दै अध्यक्ष नेपालले देश आर्थिक सङ्कटमा पुगेको दाबी गर्नुभयाे ।
उहाँले नेपाललाई कुनै पनि विदेशी शक्तिहरूको खेलमैदान नेपालीलाई खेलौना बन्न दिनुहुनेमा सजग हुन आवश्यक रहेको बताउनुभयो । उहाँले देशको हितलाई केन्द्र विन्दुमा राख्दै नेपाली जनताको दुःख कष्टलाई सम्बोधन गर्ने कुरानै पार्टीको मुख्य एजेण्डा भएको बताउनुभयो ।
अध्यक्ष नेपालले चीनसँग जोडिएको उत्तरी तातोपानी नाका, भोटेकोशी र मेलम्ची बाढीबाट प्रभावितहरूको लागि राज्यले दिएको बचन पुरा गर्नुपर्ने बताउनुभयो । कार्यक्रममा पार्टीका स्थायी कमिटी सदस्य घनश्याम भुसाल,केन्द्रिय,प्रदेश र जिल्ला तहका नेता कार्यकर्ताको बाक्लो उपस्थिति रहेको थियो ।
