काठमाडौँ । नेपाली काँग्रेसले आगामी वैशाख १० गते हुने उपनिर्वाचनका लागि पार्टीका तर्फबाट उम्मेदवारको टुङ्गो लगाएको छ ।
नेपाली काँग्रेसको केन्द्रीय कार्यसम्पादन समितिको आज पार्टी मुख्यालय सानेपामा बसेको बैठकले तनहुँ क्षेत्र नम्बर १ मा पार्टी केन्द्रीय सदस्य गोविन्द भट्टराईलाई र चितवन क्षेत्र नम्बर २ मा चितवनका पूर्व पार्टी सभापति जितनारायण श्रेष्ठलाई उम्मेदवार बनाउने निर्णय गरेको बैठकपछि प्रवक्ता डा. प्रकाशशरण महतले जानकारी दिनुभयो ।
तनहुँ क्षेत्र नं १ मा विजयी हुनुभएका रामचन्द्र पौडेल राष्ट्रपति भएकाले र चितवन क्षेत्र नं २ मा विजयी राष्ट्रिय स्वतन्त्र पार्टीका सभापति रवि लामिछानेको नागरिकता विवादका कारण सर्वोच्च अदालतले सांसद पद खारेज गरेपछि उपनिर्वाचन हुन लागेको हो ।
यस्तै प्रवक्ता डा. महतले बारा क्षेत्र नम्बर २ का सन्दर्भमा भने चैत १९ गते बस्ने केन्द्रिय कार्यसम्पादन समिति र केन्द्रिय संसदीय समितिको बैठकले निर्णय गर्ने बताउनुभयो ।
