बागमती प्रदेशमा आज आइतबार साँझ दुई जना मन्त्री थपिने भएका छन् । मुख्यमन्त्री शालिकराम जम्कट्टेलले कांग्रेसबाट दुई जनालाई नियुक्त गर्ने तयारी गरेका छन् । कांग्रेसबाट पहिलो चरणमा संसदीय दलका नेता बहादुरसिंह लामा र सांसद तीर्थ लामा मन्त्री बन्ने भएका छन् ।
आजै प्रदेश प्रमुखको कार्यालयमा शपथ ग्रहण हुने भएको छ । दुई मन्त्रीहरूको शपथका लागि तयारी भइरहेको प्रदेश प्रमुख कार्यालय स्रोतले जानकारी दिएको छ । हालसम्म मन्त्रीका लागि दुई जनाको मात्रै नाम आएको स्रोतले जानकारी दियो ।
सरकारमा कांग्रेसको नेतृत्व गर्दै बहादुरसिंहले आर्थिक मामिला तथा योजना मन्त्रालय लिने बताइएको छ । तीर्थ लामाले खानेपानी, सिंचाइ तथा ऊर्जा मन्त्रालयको जिम्मेवारी सम्हाल्ने तयारी भइरहेको जनाइएको छ । सरकारमा भागवण्डाका विषयमा लामो समयको रस्साकस्सीबीच कांग्रेस सरकारमा सहभागी हुन लागेको हो ।
मन्त्रालय भागवण्डामा कांग्रेसले ५, माओवादीले ४ र एकीकृत समाजवादीले २ मन्त्रालय लिने लगभग टुंगिएको छ ।
