टी २० विश्वकप क्रिकेट एसिया छनोट प्रतियोगिताको दोस्रो खेलमा नेपालले मलेसियाविरुद्ध १६६ रनको लक्ष्य पाएको छ । कीर्तिपुर मैदानमा टस जितेर पहिला ब्याटिङ गरेको मलेसियाले ९ विकेटको क्षतिमा १६६ रन बनायो ।
विशाल स्कोरतर्फ लम्किरहेको मलेसियालाई नेपालका अभिनाश बोहोराले रोके । उनले आफ्नो चार ओभरको बलिङमा २७ रन दिएर ४ विकेट लिए । मलेसियाका लागि ओपनर सिद अजिजले सर्वाधिक ४९ बलमा ६८ रन बनाए । यस्तै जुवैदी जुल्फिकले १६ बलमा २४ रनको योगदान दिए ।
नेपालका लागि सन्दीप लामिछाने, रोहित पौडेल र गुल्सन झाले एक एक विकेट लिँदा सोमपाल कामी र करण केसी विकेटविहीन बने । लगातार दोस्रो जित निकाली सेमिफाइल पुग्ने नेपालको लक्ष्य छ ।
