रियल मड्रिड च्याम्पियन्स लिग फुटबलको अन्तिम १६ मा प्रवेश गरेको छ । बुधबार बर्नवेउमा स्पोर्टिङ ब्रागालाई ३–० ले हराउँदै रियल प्रतियोगिताको नकआउट चरण प्रवेश गरेको हो ।
रियल मड्रिडले दुई खेल बाँकी छँदै च्याम्पियन्स लिगको अन्तिम १६ मा स्थान बनाएको हो ।
शीर्ष स्थानको रियल मड्रिडले समूह सीमा ४ खेलबाट १२ अंक जोड्यो । र दुई खेल बाँकी रहदाँ तेस्रो स्थानको स्पोर्टिङ ब्रागासँग ९ अंकको दुरी कायम राख्यो ।
ब्रागाले सुरुआतमै पेनाल्टीमार्फत खेलमा अग्रता लिने अवसर गुमाएको थियो । ब्रागाका अल्भारो जालोको पेनाल्टी प्रहारलाई गोलकिपर एन्ड्री लुनिनले बचाएका थिए । क्रिस्टियन बोरजालाई रियलका डिफेन्डर लुकास भाजक्केजले डि एरियाभित्र लडाँएपछि पाहुना टोलीले पेनाल्टीको अवसर प्राप्त गरेको थियो ।
खेलमा अग्रता रियलले २७ औं मिनेटमा ब्राहिम डियाजको गोलबाट लिएको थियो । दोस्रो हाफको ५८ औं मिनेटमा भिनिसियस जुनियरले गोल गर्दै रियलको अग्रतालाई दोब्बर बनाएका थिए । उनै भिनिसियसको पासमा रोड्रिगोले ६१ औं मिनेटमा तेस्रो गोल गर्दै रियललाई ३–० को फराकिलो जित दिलाए ।
कार्लोस एन्सेलोटीको टिमले घरेलु मैदानमा च्याम्पियन्स लिगका पछिल्ला ९ खेलमा जित निकालेको छ ।
