काठमाडौं । उपप्रधान तथा शहरी विकासमन्त्री प्रकाशमान सिंहले बुधबार सुरक्षा निकायका प्रमुखहरूसँग ब्रिफिङ लिएको भन्दै उनले फेसबुक मार्फत तस्वीरहरू भाइरल गरेका छन् ।
सिंहदरबारमा देशको पछिल्लो सुरक्षा अवस्थाबारे जानकारी लिएको मन्त्री सिंहले उल्लेख गरे ।
‘सिंहदरबारस्थित मन्त्रालयलमा बधाइ दिन आउनुभएका तिनवटै सुरक्षा निकाय नेपाल प्रहरीका महानिरीक्षक, सशस्त्र प्रहरी बल नेपालका महानिरीक्षक र राष्ट्रिय अनुसन्धान विभागका मुख्य अनुसन्धान निर्देशक संग भेटघाट गरी देशको पछिल्लो सुरक्षा अवस्था बारे जानकारि लिएको छु ।’ मन्त्री सिंहले लेखेका छन् ।
प्रहरी प्रमुख आईजी वसन्तबहादुर कुँवर, सशस्त्र प्रहरी प्रमुख आईजी राजु अर्याल र राअविका प्रमुख मुख्य अनुसन्धान निर्देशक हुतराज थापासँग भेटघाट तथा छलफल गरेको तस्बिर समेत मन्त्री सिंहले सामाजिक संजाल फेसबुकमार्फत सार्वजनिक गरेका हुन् ।
गृह मातहका नेपाल प्रहरी र सशस्त्र प्रहरी र प्रधानमन्त्री मातहतको राअविका प्रमुखलाई आफ्नो जिम्मेवारी भुलेर ब्रिफिङ लिएको भन्दै मन्त्री सिंहको आलोचना समेत भएको छ । मन्त्री सिंहले भेटपछि उल्लेख गरेको ‘देशको पछिल्लो सुरक्षा अवस्थाबारेको जानकारी’ लिनु गम्भीर त्रुटी रहेको नेपाल प्रहरीका पूर्वएआईजीहरूको बुझाइ छ ।
उच्च स्रोतका अनुसार मन्त्री सिंहलाई बधाई दिन तीन वटै सुरक्षा निकायका प्रमुखहरूले समय मागेका थिए ।
सोही क्रममा सामान्य कुराकानी भएर सुरक्षा निकायका प्रमुखहरू फर्केका थिए । त्यसपछि सिंहको फेसबुकबाट देशको पछिल्लो सुरक्षा अवस्थाबारे जानकारी लिइयो भनेर तस्वीर सार्वजनिक भएको हाे । मन्त्री सिंहका सचिवालयका एक अधिकारी भन्छन्, ‘मन्त्रीज्यूले बोलाएर मलाई ब्रिफिङ गर्नुस् भन्नु भएको पनि होइन ।
एक पूर्वआईजी शिष्टाचार निर्वाहका लागि यस्ता भेट हुने बताउँछन् । तर उपप्रधानमन्त्री कै हैसियतामा सुरक्षाबारे ब्रिफिङ भन्ने चाहिँ नहुने उनले भने ।
