सरकारले तीन जना अतिरिक्त महानिरीक्षक (एआईजी) को सरुवा गरेको छ। मंगलबार साँझ सिंह दरबारमा बसेको मन्त्रिपरिषद बैठकले प्रहरीको केन्द्रीय अनुसन्धान ब्यूरो र काठमाडौं उपत्यका प्रहरी प्रमुख पनि हेरफेर गरेको हो।
यसअघि उपत्यका प्रहरी प्रमुख रहेका एआईजी दीपक थापालाई सीआईबीको जिम्मा दिइएको छ। थापा आगामी चैतमा प्रहरी महानिरीक्षक बन्ने सबैभन्दा बलिया दाबेदार हुन्। उनले नेपाल प्रहरीको निमित्त प्रमुखको जिम्मेवारी सम्हालिसकेका छन्। प्रहरी महानिरीक्षक वसन्तबहादुर कुँवर अमेरिका प्रस्थान गरेपछि थापाले निमित्त प्रमुख पाएका थिए।
कार्य विभाग प्रमुख एआईजी किरण बज्राचार्यलाई काठमाडौं उपत्यका प्रमुखको जिम्मा दिइएको छ। यसअघिको सरकारले सीआईबीबाट हटाएका बज्राचार्यलाई महत्वपूर्ण जिम्मेवारी दिइएको हो। उपत्यका प्रहरी कार्यालय प्रमुखका रुपमा उनले करिव ५ महिना काम गर्नेछिन्। उनी पुस १६ गते अनिवार्य अवकास हुनेछिन्।
सीआईबी प्रमुख श्यामलाल ज्ञवालीलाई प्रदेश समन्वय विभागमा सरुवा गरिएको छ। एआईजीको उमेर हदका कारण उनी आगामी भदौ २६ गते अनिवार्य अवकासमा जानेछन्। अनिवार्य अवकास हुनु एक महिना अघि मात्रै उनलाई सीआईबीबाट हटाएको हो।रामदत्त जोशीलाई कार्य विभागमा पदस्थापन गरिएको छ।
