पछिल्लो समय झापामा तेस्रो लिङ्गीको नाममा आतङ्क बढ्दै गएको छ ।
उनीहरूले मागे जति रकम दिनुपर्ने, नदिए धम्की दिने, गाली गर्ने, अश्लील शब्द प्रयोग गर्ने, शरीरका सम्वेदनशील अंग देखाउने लगायतका कार्यले स्थानीय आतङ्कित बन्दै गएका छन् ।
तेस्रो लिङ्गी आउँदा भाग्नुपर्ने अवस्था आएको सर्वसाधारणहरू बताउँछन् ।
शुक्रबारको साँझ बिर्तामोड ३ सैनिकमोडस्थित विराट बहुउद्देश्यीय सहकारी संस्थामा उनीहरूले जबर्जस्ती रकम असुल्ने उद्देश्यले त्यहाँ पुगेर तेस्रो लिङ्गी ५ हजार सहयोग मागेकोमा आफूहरूले त्यति दिन नसक्ने बताएपछि सहकारी कर्मचारी लाई अपशब्द प्रयोग गरी उनीहरूले अश्लील हर्कत देखाएको सहकारीका प्रबन्धक रुद्र सिटौलाले बताए ।
सम्झाइ बुझाई गर्दा पनि अन्ततः नटेरेपछि प्रहरी बोलाएर उनीहरूलाई हटाउनु परेको सिटौलाले जानकारी दिए ।
विराट सहकारीसहित अन्य ठाउँमा पनि उनीहरूले थर्काउँदै सहयोग मागेको स्थानीयले गुनासो पोखेका छन् ।
बिर्तामोडमा केही महिनादेखि तेस्रो लिङ्गीको नाममा पसल-पसल र घर-घरमा गएर चन्दा माग्ने क्रम बढेको छ । त्यस विषयमा पीडितहरूले प्रहरीलाई जानकारी गराएका छन् ।
यद्यपि उनीहरूलाई रोक्न सकिएको छैन । केही दिनअघि एक जना तेस्रो लिङ्गीलाई पक्राउ गर्दा उनीहरूले प्रहरी कार्यालय घेराउ गरेको बताइएको छ ।
बिर्तामोडमा नेपाल र भारतका गरी करिब सय जनाले तेस्रो लिङ्गीको नाममा सहयोग सङ्कलन गरिरहेको बताईएको छ।
