वीरगञ्ज । जिल्ला प्रहरी कार्यालय बाराले जुवातास खेलिरहेका १३ जनालाई नियन्त्रणमा लिएको छ ।
विशेष सूचनाको आधारमा छापामारी गर्दा प्रहरीले जुवातास खेल्ने १३ जनालाई नियन्त्रणमा लिएको हो ।
जिल्ला प्रहरीबाट खटिएको टोलीले महागढीमाइ नगरपालिकाको बरियापुरस्थित मोतीलाल प्रसादको घरमा छापा मार्दा १३ जना पक्राउ परेका बारा प्रहरी प्रवक्ता प्रकाश सापकोटाले जनाए ।
प्रहरीले छापामारी जुवातास खेलिरहेको अवस्थामा मनोज प्रसाद कुशवाहा, बिनोद प्रसाद, मोतिलाल प्रसाद, जतिकर हुसेन, मोतिलाल कुशवाहा, राजु कुशवाहा, अच्छेलाल महतो, कस्तुरी साह, राजकिशोर प्रसाद कुशवाहा, जितेन्द्र तिवारी, सुकदेव यादव र मुस्ताक खान पैठानलाई पक्राउ गरेको हो ।
उनीहरुको साथबाट १ लाख ७१ हजार २ सय ८० रुपैयाँ बरामद भएको जिल्ला प्रहरी कार्यालय बाराले जनाएको छ ।
पक्राउ परेकाहरु महागढी नगरपालिका वडा नम्बर १ का निवासी रहेको प्रहरीले जनाएको छ ।
यस सम्बन्धमा प्रहरीले आवश्यक अनुसन्धान गरिरहेको छ ।
अवैध लागूऔषधसहित विभिन्न स्थानबाट १६ जना पक्राउ
काठमाडौं, चन्द्रागिरी नगरपालिका-१४ आदर्शटोलस्थित खाजा पसलबाट अवैध लागूऔषध गाँजाको धुलो (पोल्याण्ड) १ किलो ३ सय ग्राम र घरेलु मदिरा करिब १ सय ५० लिटर सहित पसलका संचालक सोही ठाउँ बस्ने ६४ वर्षीया पातली थिङ र २९ वर्षीया चाँदनी श्रेष्ठलाई शुक्रबार दिउँसो प्रहरीले पक्राउ गरेको छ । प्रहरी प्रभाग नैकाप र प्रहरी वृत्त थानकोटबाट खटिएको प्रहरीले पसल तलासी गर्दा उक्त लागूऔषध र घरेलु मदिरा फेला पारी दुवै जनालाई पक्राउ गरेको हो ।
बझाङ, बित्थडचिर गाउँपालिका-३ दुधढल्लाबाट अवैध लागूऔषध चरेश जस्तो देखिने पदार्थ ४ किलो ८ सय ४५ ग्राम सहित २ जनालाई शुक्रबार दिउँसो प्रहरीले पक्राउ गरेको छ । पक्राउ पर्नेहरूमा बुंगल नगरपालिका-२ दहबगर पौटा बस्ने २९ वर्षीय दिपक धामी र ४५ वर्षीय आईते धामी रहेका छन् । प्रहरी चौकी स्याडीबाट खटिएको प्रहरीले बागथलाबाट धनगढीतर्फ जाँदै गरेको सु.प.प्र.०१००१ च ३९३३ नम्बरको जिपलाई जाँच गर्ने क्रममा जिपको पछाडि राखेको मकैको कट्टाभित्र लुकाई छिपाई राखेको अवस्थामा उक्त पदार्थ फेला पारी जिपका चालक दिपक र जिपमा सवार आईतेलाई पक्राउ गरेको हो ।
चितवन, राप्ती नगरपालिका-२ गडौली पन्थ डाँडाबाट अवैध लागूऔषध गाँजा ५ किलो ३ सय ९० ग्राम सहित ३ जनालाई शुक्रबार दिउँसो प्रहरीले पक्राउ गरेको छ । पक्राउ पर्नेहरूमा सोही ठाउँ बस्ने २९ वर्षीय सुरेन लामा, २६ वर्षीय गोविन्द प्रजा र २६ वर्षीय सफल परियार रहेका छन् । इलाका प्रहरी कार्यालय रत्ननगरबाट खटिएको प्रहरीले उनीहरूलाई उक्त गाँजा सहित पक्राउ गरेको हो । झापा, मेचिनगर नगरपालिका-६ पुरानो मेचीपुलबाट अवैध लागूऔषध ब्राउनसुगर जस्तो देखिने पदार्थ १ ग्राम सहित बुद्धशान्ति गाउँपालिका-४ सृजना बस्ती बस्ने इलाम सूर्योदय नगरपालिका-८ घर भएका २१ वर्षीय पञ्चसिङ तामाङ समेत २ जनालाई शुक्रबार दिउँसो प्रहरीले पक्राउ गरेको छ । लागूऔषध नियन्त्रण व्यूरो काकडभिट्टाबाट खटिएको प्रहरीले भारतबाट नेपालतर्फ सिटिसफारीमा आउँदै गरेका उनीहरूलाई उक्त पदार्थ सहित पक्राउ गरेको हो ।
कैलाली, टीकापुर नगरपालिका-१ स्थित सडकबाट अवैध लागूऔषध खैरो हेरोइन जस्तो देखिने पदार्थ १ ग्राम ५ सय मिलिग्राम सहित लम्किचुहा नगरपालिका-१० घर भएका २४ वर्षीय मनराज सुनारलाई शुक्रबार साँझ प्रहरीले पक्राउ गरेको छ । इलाका प्रहरी कार्यालय टीकापुरबाट खटिएको प्रहरीले उनलाई उक्त पदार्थ सहित पक्राउ गरेको हो ।
मोरङ, पथरी नगरपालिका-१ सुनाखरी टोल बस्ने २५ वर्षीय राजेश मादेन समेत ५ जनालाई अवैध लागूऔषध ब्राउनसुगर जस्तो देखिने पदार्थ ४ ग्राम सहित शुक्रबार साँझ प्रहरीले पक्राउ गरेको छ । इलाका प्रहरी कार्यालय पथरीबाट खटिएको प्रहरीले राजेशको घर तलासी गर्दा उक्त पदार्थ फेला पारी उनीहरूलाई पक्राउ गरेको हो ।
बैतडी, डिलासैनी गाउँपालिका-२ गन्नाबाट अवैध लागूऔषध चेरश ७ सय ५० ग्राम सहित दार्चुला अपिहिमाल गाउँपालिका-५ बस्ने ४६ वर्षीय दान सिह धामीलाई शुक्रबार बेलुकी प्रहरीले पक्राउ गरेको छ । जिल्ला प्रहरी कार्यालय बैतडीबाट खटिएको प्रहरीले उनलाई उक्त चरेश सहित पक्राउ गरेको हो ।
यस सम्बन्धमा प्रहरीले आवश्यक अनुसन्धान गरिरहेको छ ।
