काठमाडौँ । मंगलबार बिहान आएको शक्तिशाली भूकम्पका कारण चीनमा १२६ जनाको मृत्यु भएको छ ।
चिनियाँ समाचार एजेन्सी सिन्ह्वाका अनुसार भूकम्पका कारण चीनमा अहिलेसम्म १२६ जनाको मृत्यु भएको छ भने १८८ जना घाइते भएका छन् ।
भूकम्पको केन्द्रविन्दु रहेको तिब्बत प्रान्तको दिङ्गे काउन्टीमा करिब ७ हजार मानिस बढी प्रभावित भएको सिन्ह्वाले उल्लेख गरेको छ । त्यस्तै अहिलेसम्म भूकम्पबाट ३६ सय भन्दा बढी घर भत्किएको, ४०७ जनाको सकुशल उद्धार गरिएको प्रभावित ३० हजार भन्दा बढीलाई सुरक्षित ठाउमा सारिएको रिपोर्टमा उल्लेख छ ।
चिनियाँ राष्ट्रपति सी जीङपीङले भूकम्प प्रभावितको तत्काल उद्धार र राहत गर्न निर्देशन दिएको सिन्ह्वाले जनाएको छ । त्यस्तै चिनियाँ सेनाले ड्रोनको सहयोग लिएर प्रभावितको आँकडा संकलन गरिरहेको रिपोर्टमा उल्लेख छ । अहिलेपनि राहत र उद्धारको काम जारी रहेको र मृतकको संख्या अझै बढ्नसक्ने मिडिया रिपोर्टमा उल्लेख छ ।
चीनको तिब्बत प्रान्तको दिङ्गे काउन्टीमा केन्द्रबिन्दु भएर ७ रेक्टर स्केलको भूकम्प गएको थियो । सो भूकम्पको धक्का नेपाल सहित भारतसम्म महसुस गरिएको थियो ।
दिङ्गे काउन्टी दक्षिण नेपालको सङ्खुवासभा र ताप्लेजुङ तथा दक्षिणपूर्वमा भारतको सिक्किम राज्यसँग सीमा जोडिएको क्षेत्र हो । भूकम्पको धक्का काठमाडौँ उपत्यकासहित पूर्वी नेपालका जिल्लाहरुमा महसुस गरिएको थियो । भूकम्पको धक्का २० देखि ३० सेकेन्डसम्म महसुस गरिएको थियो ।
