सिरहाको नवराजपुर गाउँपालिका १ भगवतीपुरकी १७ वर्षीया रिंकुकुमारी सदायको मृत्यु प्रकरणमा प्रहरीले थप तीन जनामाथि मुद्दा चलाउने भएको छ ।
पीडित परिवारले दिएको किटानी जाहेरी बाहेकका आठ जनालाई प्रहरीले अनुसन्धानका लागि पक्राउ गरेको थियो । तीमध्ये तीन जना पञ्चायतमा संलग्न रहेको देखिएकाले उनीहरूमाथि थप अनुसन्धान गर्न प्रहरीले अदालतबाट म्याद लिएको छ ।
धनुषाका प्रहरी प्रवक्ता डिएसपी वीरेन्द्रकुमार पासवानले घटना दबाउन र गाउँमै मिलापत्र गर्न भूमिका खेलेको देखिएकाले भगवतीपुरकै चन्देश्वर मण्डल, रामविनोद मण्डल र कमलेश दासमाथि अदालतबाट सोमबार पहिलो पटक पाँच दिनको म्याद लिएको जानकारी दिए । उनले अनुसन्धानको क्रममा नियन्त्रणमा लिएको अन्य केहि व्यक्तिको संलग्नता नदेखिएपछि छाडिएको बताए ।
गत माघ २७ गते साँझ शौच गर्न निस्केको बेला रिंकुलाई छिमेकी रूपेश मण्डल, चन्दन साह र रामविनय मण्डलले अपहरण गरी सामूहिक बलात्कार गरेका थिए । सो घटना मिलाउन पञ्चायत बसेर गाउँलेले दबाब दिएको केहि घण्टामै रिंकु आफ्नै घरमा मृत फेला परेकी थिइन् ।
प्रहरीले सुरुमा आत्महत्या दुरुत्साहन मुद्दामा छानबिन अगाडी बढाएको थियो । पछि सामूहिक बलात्कार भएको रहस्य खुलेपछि पीडित परिवारले आरोपी तीन जना र पञ्चायत बसेर दबाब दिएका वडा सदस्य नथुनी साहसहित पाँच पञ्चमाथि जाहेरी दिएका छन् ।
उनीहरुविरुद्ध कर्तव्य ज्यान, शरीर बन्धक, जबरजस्ती करणी र आत्महत्या दुरुत्साहन सम्बन्धी जाहेरी गरेको प्रहरीले जनाएको छ ।
