काठमाडौं । नेपाली सेनाको कल्याणकारी कोषमा भएको करोडौं रुपैयाँ अपचलन प्रकरणमा संलग्न ठहर गर्दै सैनिक विशेष अदालतले सहायक रथि रोशन खड्का र मेजर बोधराज कार्कीलाई सेवाबाट बर्खास्त गर्ने फैसला सुनाएको छ ।
नेपाली सेनाका अनुसार सैनिक अनुशासन, आचारसंहिता र सम्पत्तिसम्बन्धी कसुरमा दोषी ठहर गर्दै उनीहरूलाई भविष्यमा सरकारी सेवाका लागि अयोग्य नठहरिने गरी बर्खास्त गरिएको हो ।
सैनिक अदालतले सेनाको कल्याणकारी निर्देशनालयअन्तर्गतको आवास तथा बीमा शाखामा कार्यरत रहँदा खड्का र कार्कीले २ करोड २१ लाख ८५ हजार ५१५ रुपैयाँ ४८ पैसा अनियमित रूपमा खर्च गरेको ठहर गरेको छ ।
अदालतको फैसलामा अपचलन भएको उक्त रकम उनीहरूबाट असुल उपर गर्नुपर्ने आदेशसमेत गरिएको छ ।
अदालतले सेनाबाट जमदार पदबाट अवकाश लिएका आत्मराम थापा र सेनानी पदबाट अवकाश भएका लक्ष्मण अधिकारीलाई पनि दोषी ठहर गरेको छ। उनीहरू समेत मिलेमतोमा भ्रष्टाचारमा संलग्न भएको पुष्टि भएको हो ।
