राप्रपा महाधिवेशन: लिङ्देनलाई विक्रम पाण्डेको पनि साथ्

  • 1 month अगाडि

राष्ट्रिय प्रजातन्त्र पार्टीको नयाँ नेतृत्व चयनका लागि आज मतदान हुँदैछ। १५ गतेदेखि काठमाडौंको भृकुटीमण्डपमा जारी महाधिवेशन अन्तर्गत आज नयाँ नेतृत्व चयनका लागि निर्वाचन हुन लागेको हो।

निर्वाचनमा अध्यक्षका लागि कमल थापा र राजेन्द्र लिङ्देन प्यानलसहित चुनावी प्रतिस्पर्धामा उत्रिएका छन्। शनिबार बिहान ८ बजेदेखि ५ बजेसम्म निर्वाचनको कार्यतालिका राखिएको छ। निर्वाचनमा अध्यक्ष पदका लागि मतपत्र तथा पदाधिकारीका साथै केन्द्रीय सदस्यमा भने विद्युतीय मतदान गर्नुपर्ने व्यवस्था गरिएको राप्रपाको निर्वाचन समितिले जनाएको छ।

१९९ सदस्यीय नयाँ कार्यसमितिका लागि शुक्रबार २६६ जनाले उम्मेदवारी दर्ता गरएका छन्। अध्यक्ष, चार उपाध्यक्ष, तीन महामन्त्री गरी आठ पदाधिकारीसहित उम्मेदवारी दर्ता भएको हो। उपाध्यक्ष र महामन्त्रीमा कम्तीमा एक महिला निर्वाचित गर्ने व्यवस्था गरिएको छ। चार उपाध्यक्ष, तीन महामन्त्रीका साथै अन्य केही पदाधिकारी नयाँ कार्य समितिले मनोनित गर्ने व्यवस्था छ।

उम्मेदवारी दर्ताबाट करिब ५० लाख सङ्कलन भएको जनाइएको छ। करिब दुई वर्ष अगाडि राप्रपा र राप्रपा (संयुक्त) को एकतापछि पहिलो पटक हुन लागेको उक्त अधिवेशनमा यसपटक नेतृत्वका लागि तीव्र प्रतिस्पर्धा देखिएको छ। देशभरबाट चार हजार ७०० प्रतिनिधि छनोट भएका छन्। प्रतिनिधि आफ्नो पक्षको नेतृत्वका लागि मत माग्नमा व्यस्त छन्।

अध्यक्षमा कमल थापा र राजेन्द्र लिङ्देनबीच चर्को प्रतिस्पर्धा देखिएको छ। दुवैले फराकिलो मतान्तरसहित आफूले विजयी हुने दाबी गरिरहेका छन्। विक्रम पाण्डेलाई थापा र लिङ्देन दुवै पक्षले आआफ्नो प्यानलको उपाध्यक्ष पदमा राखेका छन्। तर, पाण्डे शुक्रबार लिङ्देनसँगै चुनावी प्रचारमा देखिए।

यसैलाई लिङ्देन पक्षले पाण्डे आफनै पक्षमा खुलेको दाबी गरेको छ। पूर्वमन्त्री र निर्माण व्यवसायी रहेका पाण्डेका पक्षबाट ५ सय बढी प्रतिनिधि भृकुटीमण्डप आएको उनीनिकट एक नेताले बताए।