चीनको बीआरआईलाई काउन्टर दिन जी ७ राष्ट्रले ल्याए बी३डब्लू योजना

विश्वका प्रमुख ७ बलिया अर्थतन्त्र भएको मूलुकहरु सम्मिलत जी ७ बैठकमा चीनसँग प्रतिस्पर्धा गर्ने रणनीतिहरु तय भएका छन्। क्यानडा, फ्रान्स, जर्मनी, इटाली, जापान, बेलायत र अमेरिका सम्मिलत समूहले चीनसँग प्रतिस्पर्धा गर्नको लागि न्युन र मध्यम आय भएका देशहरूलाई सहयोग गर्ने योजना अपनाएका छन्, जस अन्तर्गत जी७ देशहरूले उनीहरूलाई राम्रो पूर्वाधार निर्माण गर्न मद्दत गर्नेछन्।

सम्मेलनमा अमेरिकी राष्ट्रपति जो बाइडेनले चीनको बेल्ट एन्ड रोड इनिसियटिभ्स बीआरआईलाई चुनौती दिन ‘बिल्ड ब्याक बेटर वर्ल्ड’ बी३डब्लू योजना प्रस्तुत गरेका छन्। यस्ता गुणस्तरीय योजना खडा गरे चीनलाई चुनौती दिन सकिने बाइडेनको भनाइ छ। बीआरआई अवधारणाअनुसार चीनले कयौं देशमा रेल, सडक, बन्दरगाह लगायतका पूर्वाधार सुधारको लागि आर्थिक मद्दत गर्ने गरेको छ। जसका कारण चीनले आफ्नो प्रभाव विश्वका कयाै देशमा बढाउन सफल भएको छ।

रोयटर्सका अनुसार चीनको बीआरआईलाई काउन्टर दिने बी३डब्लू योजनालाई जी ७ राष्ट्रहरुले अनुमोदन गरेका छन्। बाइडेनका अनुसार यस योजनाले विश्वका विकासोन्मुख राष्ट्रहरुलाई ठूलो सहायता पुग्नेछ। यस योजनाले चार सय खर्ब अमेरिकी डलरले पूर्वाधारको खाडल संकुचित गर्न मद्दत पुग्नेछ।

बेलायतकाे सम्मेलनमा अनुमाेदन भएकाे याेजनाकाे विषायमा ह्वाइट हाउसले भनेको छ,‘बी३डब्लूको दायरा विश्वव्यापी हुनेछ, यो ल्याटिन अमेरिका र क्यारिबियनदेखि अफ्रिका र इण्डो–प्यासिफिक क्षेत्रसम्म फैलिनेछ।’ जी ७ का साझेदार राष्ट्रहरु भिन्न भौगोलिक क्षेत्रका हुनेछन्, तर यो योजनाले विश्वका न्युन र मध्यम आय भएका देशहरूलाई समाहित गर्ने ह्वाइट हाउसको भनाइ छ।

यो कार्यक्रममा जी–सेभेनले कसरी लगानी गर्नेछ भन्ने विस्तृत विवरण प्रकाशमा आएको छैन । जर्मन चान्सलर एन्जेला मर्केलले अहिलेसम्म कुनै मुलुकबाट लगानीका लागि पहलकद्मी नभैसकेको बताइन् । अमेरिकाले सुरुदेखि नै चीनको कथित ‘ऋण कूटनीति’बारे आलोचना गर्दै आइरहेको छ । जी-सेभेनका सदस्य मुलुकहरुले भविष्यमा महामारी आउन नपाओस् भनेर योजना अघि सार्ने तयारी गरिरहेका छन् ।

शनिबार भएको जी-सेभेनको सत्रमा अमेरिकाले विश्वमा चिनियाँ प्रभुत्व बढिरहेको भन्दै चिन्ता व्यक्त गरेको थियो । उक्त सत्रमा राष्ट्रपति बाइडेनले विकसित मुलुकहरुमा चीनले अघि सारेको बेल्ट एन्ड रोड इनिसिएटिभलाई चुनौति दिने गरि पश्चिमा लोकतान्त्रिक मुलुक अघि आउनुपर्ने बताएका थिए । जी–सेभेनको अन्तिम बैठक सोमबार बस्दैछ । बेलायतमा चलिरहेको बैठकले संयुक्त घोषणपत्र पनि जारी गर्ने तयारी गरिरहेको छ ।

आफूलाई घेर्ने र चुनौति दिने जी-सेभेनको निर्णय आउने वित्तिकै चीनले क्रुद्ध प्रतिक्रिया दिएको छ । लन्डनस्थित चिनियाँ दूतावासका प्रवक्ताले साना देशहरुको समूहले विश्वको भाग्यबारे निर्णय गर्ने जमाना सकिएको बताएका छन् ।

रोयटर्सलाई उध्दृत गर्दै चिनियाँ दूतावासका प्रवक्ताले भनेका छन्, ‘साना देशहरुले विश्वको भाग्यको निर्णय गर्ने जमाना गयो । हामी हामी ठूला र साना, बलियो र कमजोर, धनी र गरिब मुलुकहरु एउटै हुने दृष्टिकोण राख्छौं । विश्वको निर्णय ती देशहरुसँगको परामर्शमा मात्र सम्भव हुन्छ ।’

Golu
http://kantipath.com

यो छुट्टाउनु भो कि..