पशुपतिको धर्मशाला होटलबाट पनि बतास लखेटिँदै : आलेले बनाए समिति

  • 1 week अगाडि

काठमाडौं । नारायणहिटी दरबार परिसरभित्र चलाउन खोजिएको रेष्टुरेन्ट निर्माणको काम भत्काउन निर्देशन दिएका संस्कृति, पर्यटन तथा नागरिक उड्डयनमन्त्री प्रेमबहादुर आलेले फेरि अर्को स्टेप चालेका छन् । उक्त रेष्टुरेन्ट हिजै भत्किसकेको छ ।

मन्त्री आलेको निर्देशनमा मन्त्रालयले पशुपति क्षेत्र विकास कोषका कोषाध्यक्ष नारायणप्रसाद सुवेदीको संयोजकत्वमा एक छानबिन समिति गठन गरेर नेपाल–भारत पशुपति मैत्री धर्मशालाको सत्यतथ्य छानविन गर्न लगाइने भएको छ ।

पाँच सदस्यीय रहेको टोलीले समितिलाई सात दिनभित्रमा प्रतिवेदन पेस गर्न भनिएको छ । पशुपति मैत्री धर्मशालालाई होटेलका रूपमा सञ्चालन गर्न लागिएको बुझ्नमा आएपछि मन्त्री आलेले त्यसको सत्य तथ्य छानबिन गर्न समिति गठन गरेका हुन् ।

धर्मशालालाई पशुपति क्षेत्र विकास कोषले होटेल आनन्द प्रालिलाई होटेल चलाउनमा भाडामा दिएको थियो । होटेल चलाउन अनुमति पाउने संस्था त्यहीँ नारायणहिटीभित्र रेष्टुरेन्ट चलाउन खोज्ने बतास अर्गनाइजेसन नै रहेको रहेको छ ।

बतास समूहमाथि पशुपति मैत्री धर्मशालालाई होटेल बनाएको र तीर्थालु एवं धार्मिक पर्यटकहरुबाट भाडाका नाममा मनपरी गरेको आरोप छ ।