बारा र पर्साका आँधीहुरी प्रभावितका लागि आवास निर्माणको काम सुरु

काठमाडौ । बारा र पर्साका आँधीहुरी प्रभावितका लागि आवास निर्माणको काम बिभिन्न १२ स्थानबाट एकसाथ सुरु गरिएको छ ।

उपप्रधान एवं रक्षामन्त्री ईश्वर पोखरेल, उपप्रधान एवं स्वास्थ्यमन्त्री उपेन्द्र यादव र प्रदेश २ का मुख्यमन्त्री लालबाबु राउतलगायत सङ्घीय सरकारका अन्य ९ मन्त्रीले आवास निर्माण कार्यक्रमको आज शिलान्यास गरेका हुन् ।

फेटा गाउँपालिका ६ पुरैनियामा उपप्रधान एवं रक्षामन्त्री पोखरेलले शिलान्यास गर्नुभयो भने परवानीपुर ४ चैनपुरमा उपप्रधान एवं स्वास्थ्यमन्त्री उपेन्द्र यादव, प्रसौनी गाउँपालिका ४ खटुवाजग्दीमा गृहमन्त्री रामबहादुर थापा, वीरगञ्ज महानगरपालिका २२ जगन्नाथपुरमा ऊर्जामन्त्री वर्षमान पुनले शिलान्यास गर्नुभएको छ ।

सुवर्ण गाउँपालिका ४ हर्दियामा भौतिक पूर्वाधारमन्त्री रघुवीर महासेठ, पचरौता नगरपालिका ७ बेनौलीमा सामान्य प्रसाशनमन्त्री लालबाबु पण्डितले आवास निर्माणका शिलान्यास गर्नु भएको सैनिक जनसम्पर्क तथा सूचना निर्देशनालयले जनाएको छ ।

फेटा गाउँपालिका ४ भलुहीमा महिला, बालबालिका तथा जेष्ठ नागरिकमन्त्री थममाया थापा, वीरगञ्ज महानगरपालिका ५ उदयपुर घुर्मीमा खानेपानीमन्त्री बिना मगर, फेटा गाउँपालिका ४ भरवलीयामा सहरी विकासमन्त्री मोहम्मद ईस्तियाक राई, महागढीमाई नगरपालिका ७ तेलगाईमा भूमी व्यवस्थामन्त्री पद्माकुमारी अर्यालले शिलान्यास गर्नुभयो ।

कलैया उपमहानगरपालिका १३ छोट्कीफुलबारिया र देवताल गाउँपालिका ७ रामपुर्वामा प्रदेश २ का मुख्यमन्त्री लालबाबु राउतले आवास निर्माणको शिलान्यास गर्नु भएको छ ।

पर्सामा ९१ घर र बारामा १३ सय ६२ घर गरी जम्मा १४ सय ५३ घर निर्माणका लागि विभिन्न १२ ठाउँमा नेपाली सेनाका इन्जिनियरहरूलगायत २३ सय ३२ जना जनशक्ति परिचालित भएको नेपाली सेनाले विज्ञप्तिमार्फत जनाएको छ ।

तीन चरणमा सम्पन्न गर्नेगरी निर्माण सुरु गरिएको हो । पहिलो चरणमा ४ सय ८२ घरहरू जेठ २६ गतेभित्र, दोस्रो चरणमा ४ सय ८२ घर असार २८ गतेभित्र र तेस्रो चरणमा ४ सय ८९ घर साउन ३० गतेभित्र निर्माण सम्पन्न गर्ने लक्ष्य लिइएको नेपाली सेनाले जनाएको छ ।

Kantipath News

Leave a Reply

Your email address will not be published. Required fields are marked *

You may use these HTML tags and attributes:

<a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

यो छुट्टाउनु भो कि..