काठमाडाैं । विप्लव समूह भनेर चिनिने नेपाल कम्युनिष्ट पार्टीको एक खेमाले ललितपुरको सानेपास्थित आस्था प्रकाशन प्रालिको कार्यालयमा पेस्तोलधारी ‘गुण्डा’ पठाएर धाकधम्की दिएको छ ।
साउन ८ गते मंगलबार बिहान १०ः०० बजेदेखि पटक-पटक 9844838892 नम्बरको मोबाइल नम्बरबाट फोन गरी आफूलाई सचिवालय सचिव कपिल सिको परिचयबाट चिनाएका व्यक्तिले अत्यन्त स्तरहीन शब्द प्रयोग गरी संस्थाका अध्यक्ष तथा प्रधानसम्पादक किशोर श्रेष्ठलाई गालीगलौज गर्दै बम हानेर उडाइदिने धम्की दिएका हुन्।
त्यहीं दिन दिउँसो सानेपा, धोबिघाटस्थित कार्यालयमा कम्मरमा पिस्तोल भिरेर प्रवेश गरेका केही व्यक्तिले सबै कर्मचारीलाई धम्क्याउँदै ‘एक घण्टाभित्र बुध्दनगरको कार्यालयमा हाजिर हुन नआए बम हानेर कार्यालय उडाइदिने’ भनी आतंकित पार्दै पत्रिका प्रकाशन कार्यमा समेत केही घण्टा अवरोध गरेकाे जनआस्थाले जनाएकाे छ ।
हतियारधारी व्यक्ति कार्यालयमा पसेर हो-हल्ला गरेपछि प्रहरीलाई खबर गरिएकोमा निज कपिल सि सोही दिन पक्राउ परेको प्रहरीले पक्राउ गरेर हिरासतमा राखेकाे छ ।
यसैबिचमा महासंघकाे ध्यानाकर्षण भएकाे छ ।
हेर्नुहाेस् विज्ञप्ति जस्ताकाे त्यस्तै :
जनआस्था साप्ताहिकका प्रधान सम्पादक किशोर श्रेष्ठलाई भौतिक कारबाहीको धम्की दिएको घटनाप्रति महासंघको गम्भीर ध्यानाकर्षण
मिति :२०८१।०४।१०
जनआस्था साप्ताहिकका प्रधानसम्पादक एवं प्रेस काउन्सिल नेपालका पूर्व कार्यवाहक अध्यक्ष किशोर श्रेष्ठलाई आफूलाई नेकपा विप्लवको विद्यार्थी संगठनको सचिवालय सचिव बताउने कपिल सी भन्ने व्यक्तिले मोबाइलबाट फोन गरी अश्लील गालीगलौज गर्दै भौतिक कारबाहीको धम्की दिएको घटनाप्रति नेपाल पत्रकार महासंघको गम्भीर ध्यानाकर्षण भएको छ ।
साउन ८ गते मंगलबार बिहान १०ः०० बजेदेखि मोबाइल नम्बरबाट फोन गरी निज व्यक्तिले अत्यन्त स्तरहीन शब्द प्रयोग गरी प्रधानसम्पादक श्रेष्ठलाई धम्कीपूर्ण शैलीमा गालीगलौज गर्दै ज्यान मार्ने धम्की दिएको श्रेष्ठले महासंघलाई जानकारी गराउनु भएको छ । धम्कीका क्रममा निज व्यक्तिले ‘प्रधानसम्पादक श्रेष्ठ र उहाँकी श्रीमतीलाई जहाँ भेटे त्यही मारिदिने’ बम हानेर घर उडाइदिने’ जस्ता धम्की दिएका थिए ।
साथै, सोही दिन दिउँसो सानेपाको धोबिघाटस्थित पत्रिकाको कार्यालयमा हतियारसहित आएका एक व्यक्ति प्रवेश गरेर धम्कीपूर्ण भाषा प्रयोग गरी कार्यालयका रहेका सबै कर्मचारीलाई धम्क्यार ‘एक घण्टाभित्र हाजिर हुन आउने, नआए बम हानेर कार्यालय उडाइदिने’ भनेर धम्क्याउदै पत्रिका प्रकाशन कार्यमा समेत अवरोध गरेको जानकारी प्राप्त भएको छ ।
समाचारसँग सम्बन्धित विषयमा चित्त नबुझेका कुरा भए वार्ता र सम्वादका माध्यम वा कानुनी उपचारको बाटो अवलम्बन गर्नुपर्नेमा त्यसो नगरी यस किसिमको अपराधिक तवरले भौतिक कारबाहीको धम्की दिने, बम हानिदिने र गालीगलौज गर्ने जस्ता हर्कत हुनु समग्र पत्रकारिता क्षेत्रमाथिकै प्रहार हो ।
पत्रकारलाई आतंकित, त्रसित र हतोत्साहित बनाउने यो कार्यमा संलग्नको तत्काल पहिचान गरी कानुनी दायरामा ल्याएर पत्रकारको सुरक्षामा विशेष ध्यान दिन सम्बन्धित निकायसँग माग गर्दै महासंघ संविधानले सुनिश्चित गरेको पत्रकार अधिकारको सम्मान गरी यस किसिमका गतिविधि नदोहो¥याउन सम्बन्धित पक्षको ध्यानाकर्षण गराउँदछ ।
रोसन पुरी/ महासचिव
