काठमाडौं । छिमेकीसँग झगडा गर्ने धनकुटाका कलाकार भुवन डंगोल पक्राउ परेका छन् ।
धनकुटा ७ निवासी कलाकार डंगोलले छिमेकी सुरेश गिरीसँग झैझगडा गरेको आरोपमा जिल्ला प्रहरी कार्यालय धनकुटाले हिरासतमा राखेको छ ।
धनकुटाका स्थानीय कलाकारका रुपमा चिनिएका डंगोललाई सार्वजनिक स्थलमा हातपात गरेको, अभद्र व्यवहार लगायतका आरोपमा जिल्ला अदालत धनकुटाबाट १० दिनको म्याद लिएर अनुसन्धान जारी रहेको प्रहरीले जनाएको छ ।
छिमेकी गिरीसँग जग्गाको सिमानाको विषयमा विवाद भएपछि बुधबार धनकुटा नगरपालिकाको न्यायीक समितिमा छलफल गराएर मिलापत्र गराइएको थियो ।
तर डंगोलले घरको छेउमा लगाइएको बासको टाटी हटाउने सवालमा विवाद झिकी पुनः हातपात गरेपछि शिरवानी टोल बिकास संस्थाका अध्यक्षसमेत रहेका गिरीसहित स्थानीयले जिल्ला प्रहरी कार्यालय धनकुटामा उजुरी दिएका थिए ।
उनले छिमेकको कुरा छिमेकमै बसेर मिल्छौ भनेपछि न्यायिक समितिले मिलापत्र गराएको थियो ।
तर डंगोलले न्यायीक समितिले गराएको सहमति विपरित गिरीलाई हातपात गरेका थिए ।
सोही उजुरीका आधारमा प्रहरीले बिहीबार पक्राउ गरी थप अनुसन्धानका लागि हिरासतमा लिएको थियो ।
डंगोलले केही समयअघि प्रहरीलाई पनि अभद्र व्यवहार गरेका थिए । त्यतिबेला उनलाई एक दिन हिरासतमा राखेर छोडिएको थियो ।
डंगोल धनकुटा नगरपालिका –९ बेलहरास्थित देउराली माध्यमिक विद्यालयका शिक्षकसमेत हुन् ।
उनी स्थायी शिक्षक हुन् ।
उनीसँग छरछिमेकसमेत रुष्ट छन् ।
