काठमाडौं, असोज १६ – काठमाडौंको बुढानिलकण्ठस्थित प्रहरी प्रभागको हिरासतमा राखिएका एक थुनुवाले आत्महत्या गरेका छन्। मृतकको नाम मिरुन सिवा भन्ने बुझिएको छ। प्रहरीका अनुसार थुनुवाले हिरासत कक्षभित्रको शौचालयमा झुण्डिएर आत्महत्या गरेका हुन्। झुन्डिएको अवस्थामा भेटिएपछि प्रहरीले उनलाई टिचिङ्ग अस्पताल लगेको थियो।
मृतक सवारी दुर्घटना सम्बन्धी मुद्दामा पक्राउ परेका थिए। घटनाबारे बुझ्न खोज्दा महाराजगन्ज वृत्तका डिएसपीले अहिले अनुसन्धान भइरहेको बताएका छन्।
घटनापछि थप अनुसन्धानका लागि आवश्यक प्रक्रिया अघि बढाइएको प्रहरी स्रोतले कान्तिपथलाई जनाएको छ।
