एप्पलले आईफोन र आईप्याडका लागि नयाँ सफ्टवेयर अपडेट जारी गर्दै प्रयोगकर्ताको गोपनीयतासँग सम्बन्धित गम्भीर त्रुटि समाधान गरेको जनाएको छ। उक्त बगका कारण मेटिएका वा स्वतः हट्ने सन्देशसमेत फोनको ‘नोटिफिकेसन क्यास’ मा केही समयसम्म सुरक्षित रहने गरेको पाइएको थियो।
रिपोर्टअनुसार Signal जस्ता एपबाट मेटिएका सन्देशहरू पनि प्रणालीस्तरमै सुरक्षित रहँदा सुरक्षा निकायहरूले ती डेटा पुनः प्राप्त गर्न सक्ने अवस्था बनेको थियो। स्वतन्त्र सञ्चार माध्यम 404 Media ले सार्वजनिक गरेको विवरणमा Federal Bureau of Investigation ले एक अभियुक्तको फोनबाट यस्ता मेटिइसकेका सन्देशसमेत फेला पारेको उल्लेख गरिएको थियो।
एप्पलले आफ्नो सुरक्षा सूचनामार्फत “मेटाउन चिन्ह लगाइएका नोटिफिकेसन अपेक्षाभन्दा लामो समयसम्म उपकरणमा रहने” समस्या रहेको स्वीकार गरेको छ। कम्पनीले नयाँ iOS 26.4.2 तथा पुराना मोडेलका लागि iOS 18.7.8 अपडेटमार्फत उक्त समस्या समाधान गरेको जनाएको छ।
सिग्नल एपकी अध्यक्ष Meredith Whittaker ले पनि मेटिएका सन्देशका नोटिफिकेसन अपरेटिङ सिस्टममै रहनु नहुने भन्दै यस विषयमा एप्पलको ध्यानाकर्षण गराएकी थिइन्।
यस घटनाले डिजिटल गोपनीयतासम्बन्धी चिन्ता बढाएको छ। सामान्यतया प्रयोगकर्ताहरूले गोप्य संवादका लागि ‘डिसएपियरिङ मेसेज’ सुविधा प्रयोग गर्ने गरे पनि प्रणालीमै डेटा सुरक्षित रहँदा उक्त सुरक्षा प्रभावहीन हुने देखिएको थियो।
एप्पलले समस्या समाधान गरिसकेको भन्दै प्रयोगकर्ताहरूलाई आफ्नो उपकरण तुरुन्तै अपडेट गर्न आग्रह गरेको छ, ताकि मेटिएका सन्देशहरू पुनः प्राप्त हुने जोखिमबाट जोगिन सकियोस्।
