पूर्वप्रधानमन्त्रीद्वय शेरबहादुर देउवा र पुष्पकमल दाहाल ‘प्रचण्ड’ तथा पूर्वऊर्जामन्त्री दीपक खड्कामाथि सम्पत्ति शुद्धीकरण विभागले औपचारिक रूपमा छानबिन सुरु गरेको छ। उनीहरूको निवासबाट बरामद गरिएको जलेको नोट र खरानीको फरेन्सिक रिपोर्टले उक्त अवशेष नेपाली तथा विदेशी मुद्रा नै भएको पुष्टि गरेपछि विभागले कारबाही प्रक्रिया अघि बढाएको हो।
नेपाल प्रहरीको केन्द्रीय अनुसन्धान ब्युरो (CIB) र विभागको संयुक्त टोलीले संकलन गरेको खरानीको परीक्षण गर्दा उक्त वस्तु जलेको पैसा नै भएको प्रमाणित भएको छ। विभागका अनुसार यो रिपोर्टले ‘मनी लन्ड्रिङ’ (सम्पत्ति शुद्धीकरण) को मुद्दा अगाडि बढाउन ठोस र बलियो आधार खडा गरेको छ।
प्रधानमन्त्री सुशीला कार्कीले फरेन्सिक रिपोर्टलाई मुख्य आधार मानेर घटनाको कडा छानबिन गर्न निर्देशन दिनुभएको छ। विभागले उनीहरूले सत्ता र शक्तिको आडमा गैरकानुनी सम्पत्ति आर्जन गरेको आशंकामा अनुसन्धान केन्द्रित गरेको छ।
