इंग्लिस प्रिमियर लिग फुटबलमा चेल्सीलाई पराजित गर्दै आर्सनल शीर्ष स्थानमा उक्लिएको छ । आइतबार राति भएको खेलमा आर्सनलले चेल्सीलाई १–० गोलले पराजित गरेको हो ।
घरेलु टिम चेल्सीले आफ्नै मैदानमा आर्सनललाई रोक्न सकेन । पहिलो हाफमा बराबरी खेलेको चेल्सीले दोस्रो हाफमा गोल खान पुग्यो । आर्सनलको जितमा गाब्रियल मागालहाइसले गोल गरे ।
उनले खेलको ६३औँ मिनेटमा गोल गर्दै आर्सनललाई जित दिलाए । प्रिमियर लिगमै भएको अर्को खेलमा साउथह्याम्पटन न्युक्यासलसँग ४–१ गोलले पराजित भएको छ ।
अर्को खेलमा क्रिस्टल प्यालेसले वेष्टहामलाई २–१ गोलले हराएको छ । जितसँगै आर्सनल लिगको शीर्ष स्थानमा उक्लिएको छ । आर्सनलको १३ खेलबाट ३४ अंक भएको छ ।
पराजित चेल्सी भने सातौँ स्थानमा छ । चेल्सीको १३ खेलबाट २१ अंक छ । दोस्रो स्थानमा झरेको म्यानचेस्टर सिटीको १३ खेलबाट ३२ अंक छ ।
