प्रधानमन्त्री निवास बालुवाटारमा सत्ता गठबन्धनको बैठक सुरु भएको छ । चुनावपछि गठबन्धनको बैठक पहिलोपटक भएको हो । बैठकमा पाँचदलीय गठबन्धनका सबै शीर्ष नेताहरू सहभागी छन् । यो बैठकमा चुनावको समीक्षा र नयाँ सरकारबारे छलफल हुनेछ ।
४ मंसिरमा भएको चुनावको प्रत्यक्षतर्फको अन्तिम परिणाम आइसकेको छ भने समानुपातिकतर्फको मतगणना पनि अन्तिम चरणमा छ । सत्ता गठबन्धनले स्पष्ट बहुमत नल्याउने तर बहुमत नजिक हुने देखिएको छ ।
सत्ता गठबन्धनका दुई दल नेकपा माओवादी केन्द्र र नेकपा एकीकृत समाजवादीले मत ट्रान्सफर नभएको भन्दै असन्तुष्टि जनाउँदै आएका छन् । कांग्रेस भने कमब्याक गर्दै संसदमा सबैभन्दा ठूलो दल बन्ने निश्चित भइसकेको छ ।
