फिफा विश्वकप फुटबलको उपाधि जित्न सफल भएकोमा ब्राजिलका चर्चित खेलाडी नेयमारले अर्जेन्टिनाका कप्तान लियोनल मेसीलाई बधाई दिएका छन्। उनले सामाजिक सञ्जालमार्फत मेसीलाई बधाई दिएका हुन्।
मेसीले ट्रफी चुमेको तस्बिर राख्दै नेयमारले लेखेका छन, ‘बधाई छ ब्रदर मेस्सी।’ अर्जेन्टिनाले गएराति लुसेल स्टेडियममा भएको फाइनलमा फ्रान्सलाई पेनाल्टी सुटआउटमा ४–२ ले हराउँदै तेस्रोपटक उपाधि जितेको हो।
उपाधि दिलाउने क्रममा पेनाल्टीमा अर्जेन्टिनाका लियोनल मेसी, पाउलो डिबाला, लिन्द्रो पाराडेस र गोन्जालो मोन्टीले गोल गरे।
फ्रान्सका लागि भने केलियन एम्बाप्पे र रान्डेल कोलो मुवानीले मात्र पेनाल्टीमा गोल गरे। किन्सले कोम्यान र अरुलिन चुवामेनी भने पेनाल्टीमा गोल गर्न सकेनन्।
