धनगढी I प्रधानमन्त्री पुष्पकमल दाहाल प्रचण्डले गेटा मेडिकल कलेज राष्ट्रिय स्वास्थ्य विज्ञान विश्वविद्यालय बनाउने प्रक्रिया अघि बढिसकेको बताउनुभएको छ ।
कैलालीको गेटामा रहेको निर्माणाधीन गेटा मेडिकल कलेजको आज स्थलगत निरीक्षण गर्नु हुँदै प्रधानमन्त्री दाहालले गेटामम दशरथ चन्द राष्ट्रिय स्वास्थ्य विज्ञान विश्वविद्यालय बनाउने गरि मन्त्रिपरिषद्ले सैद्धान्तिक निर्णय गरेको बताउनु भयो । प्रधानमन्त्री दाहालले गेटा मेडिकल कलेज सञ्चालन कार्यको तीव्रतासँगै राष्ट्रिय स्वास्थ्य विज्ञान विश्वविद्यालय स्थापनाको काम अघि बढेको बताउनु भयो । मेडिकल कलेजसँगै स्वास्थ्य विज्ञान विश्वविधालयको स्थापना हुनु देशकै गौरव भएको उहाँले बताउनुभयो ।
प्रधानमन्त्री दाहालले सुदूरपश्चिमको विकासलाई आफूले सदैव प्राथमिकता दिएको उल्लेख गर्दै यसपाली समेत प्रधानमन्त्री बनेपछि आफूले सुदूरपश्चिमबाटै विकास आयोजनाको अनुगमन थालेको बताउनुभयो ।
त्यस क्रममा गेटा मेडिकल कलेजका कार्यकारी निर्देशक एवं पूर्वाधार निमार्ण समितिका सदस्य सचिव हेमराज पुजाराले पूर्वाधारतर्फ करिब ८० प्रतिशत निमार्ण कार्य पूरा भएको बताउनु भयो । हालसम्म २८ भवन निमार्ण भएको दर्जन बढी भवन निमार्णको कार्य अन्तिम चरणमा पुगेको जानकारी दिनु भयो । भवन निमार्णमा करिब साढे ५ अर्ब खर्च भएको बताइएको छ । कार्यक्रममा उद्योग, वाणिज्य तथा आपूर्ति मन्त्री दामोदर भण्डारी, प्रदेश प्रमुख देवराज जोशी, मुख्यमन्त्री कमलबहादुर शाह, उच्च सरकारी अधिकारी लगायतको सहभागिता रहेको थियो ।
