काठमाडौँ- चलचित्र ‘प्रसाद २’को प्रदर्शन रोक्न उच्च अदालत पाटनले अल्पकालीन आदेश जारी गरेको छ । न्यायाधीश सुदर्शनराज पाण्डेको इजलासले चलचित्रको प्रदर्शन रोक्न अल्पकालीन आदेश दिएको हो । सुदर्शन थापा निर्देशित चलचित्र आउँदो शुक्रबारदेखि प्रदर्शनको तयारीमा थियो ।
चलचित्र निर्माता सुवास थापाले आफ्नो रकम नदिएको भन्दै केशव पाण्डेले चलचित्र रोक्न माग राखेर उच्च अदालत पाटनमा रिट दायर गर्नुभएको थियो । चलचित्र निर्माता थापाविरुद्ध आर्थिक लेनदेन र बैङ्किङ कसुर मुद्दामा पक्राउ पुर्जी जारी गरिएको छ ।
प्रहरीले उनलाई खोजिरहे पनि उनी फरार छन् । अदालतले थप सुनुवाइका लागि २६ गते दुवै पक्षलाई अदालतमा बोलाएको छ । पाण्डे यसअघि ‘प्रसाद २’को निर्माताका रूपमा चिनिनुभएको थियो । हाल चलचित्रको प्रचारप्रसार सामग्री सार्वजनिक हुँदा होस् वा अन्य स्थानमा, उहाँ निर्माताका रूपमा रहेको विषयवस्तु समेटिएको छैन ।
