राष्ट्रपति रामचन्द्र पौडेलले आफ्नो उपचारमा लागेको सबै खर्च आफैँले ब्यहोर्ने भएका छन् । भारतको नयाँ दिल्लीस्थित एम्समा उपचार गर्दा लागेको सम्पूर्ण खर्च राष्ट्रपति पौडेल आफैँले ब्यहोर्ने राष्ट्रपतिका प्रेस संयोजक खिला कार्कीले जानकारी दिए । मंगलबार विज्ञप्ति जारी गरी संयोजक कार्कीले उपचारका क्रममा भएको उपचार खर्च राष्ट्रपति आफैँले ब्यहोर्ने उल्लेख गरेका छन् ।
‘त्रिवि शिक्षण अस्पतालमा उपचारका क्रममा स्वास्थ्यमा सुधार हुन नसकेपछि चिकित्सकहरूको सुझाव अनुसार भारतको नयाँदिल्लीस्थित एम्समा उपचार भएको सम्पूर्ण नेपाली दिदीबहिनी दाजुभाइहरूमा वितिदै छ । उपचारका क्रममा भएको उपचार खर्च सम्माननीय राष्ट्रपतिज्यू स्वयम्ले ब्यहोर्न चाहेको कुरा जानकारीका लागि अवगत गराइन्छ,’ विज्ञप्तिमा भनिएको छ ।
यसअघि कांग्रेस महामन्त्री गगन थापाले सोमबार आयोजित एक कार्यक्रममा राष्ट्रपति पौडेलले आफ्नो उपचार खर्च आफैँले ब्यहोर्नुपर्ने बताएका थिए ।
