इन्टाग्रामका संचालक मेटाले ट्वीटरको प्रतिस्पर्धी एपको शुरुवात गरेको छ । ट्वीटरले हालैका दिनमा आफ्नो प्लेटफर्ममा गरेको परिवर्तनबाट निराश बनेका यसका प्रयोगकर्तालाई मेटाले ल्याएको नयाँ एप ‘थ्रेड्स’ले आकर्षण गर्ने अनुमान गरिएको छ ।
हालै संचालनमा ल्याइएको मेटाको नयाँ एप ‘थ्रेड्स’ बेलायतसहित विश्वका एक सय मुलुकमा डाउनलोडका लागि उपलब्ध छ । तर युरोपेली संघमा आवद्ध राष्ट्रहरुमा भने अलग्गै नियमनकारी नियमका कारण यो एप उपलब्ध छैन ।
नयाँ एपमा प्रयोगकर्ताले पाँच सय शब्द सम्मको पोष्ट सिर्जना गर्न सक्छ । यसका धेरै सुविधा र विशेषता ट्वीटरमा जस्तै रहेका छन् । तर प्रतिद्वन्दीहरुले यसले संकलन गर्न सक्ने तथ्यांकका विषयमा भने आलोचना गरेका छन् ।
मेटाले प्रारम्भिक संस्करण भनेर संचालनमा ल्याएको नयाँ एपमा मास्टोडन जस्ता अन्य सामाजिक संजालमा जस्तै मानिसहरुसँग अन्तरक्रिया गर्न सक्ने क्षमता सहितका अतिरक्त सुविधा थप गर्ने योजना रहेको छ ।
