काठमाडाैं । गत अप्रिल २४ मा भारतको मध्यप्रदेशको रेवामा ९ वर्षीया बालिकाको बलात्कारपछि हत्या भएको घटनाको अनुसन्धान गरिरहेको प्रहरीले नयाँ तथ्य फेला पारेको छ ।
प्रहरीले किशोर दाजुले मोबाइलमा पोर्नोग्राफिक भिडियो हेरेपछि बालिकालाई यौन दुर्व्यवहार गरेको र त्यसपछि उनको हत्या गरेको पत्ता लगाएको हो ।
उनका आमा र दुई दिदीहरूले घटना लुकाउन मद्दत गरेको पनि प्रहरी अधिकारीको भनाई छ ।
प्रहरीले घटनाको अनुसन्धान गरी ५० जनासँग सोधपुछपछि पीडितका १३ वर्षीय दाजु, आमा र १७ र १८ वर्षका दिदीबहिनीलाई शनिबार नियन्त्रणमा लिएको थियो ।
घटनाको विवरण दिँदै प्रहरी उपरीक्षक विवेक सिंहले भने, ‘गत अप्रिल २४ मा ९ वर्षीया बालिकाको बलात्कारपछि घाँटी थिचेर हत्या गरिएको थियो, त्यसपछि प्रहरीले मुद्दा दर्ता गरी अनुसन्धान थालेको थियो ।’
उनले भने, ‘घटनाको समयमा उनी सुतिरहेको घरको आँगनबाट पीडितको शव फेला परेको थियो ।
परिवारका सदस्यसँग गहन सोधपुछपछि पीडितको १३ वर्षीय दाजु राति उनको छेउमा सुतेको खुलासा भएको थियो ।
मोबाइलमा अश्लील भिडियो हेरेर किशोरले बहिनीलाई बलात्कार गरेको पत्ता लाग्यो ।’
पीडितले यो कुरा बुबालाई बताइदिने धम्की दिएपछि किशोरले उनको घाँटी थिचेर हत्याको प्रयास गरेपछि आमालाई उठाएर त्यसबारे जानकारी दिए ।
त्यसपछि उनले पीडित अझै जीवित रहेको थाहा पाए। त्यो देखेपछि आरोपीले फेरि उनको घाँटी थिचेर हत्या गरेको सिंहले बताए ।
यसैबिच उनका दुई दिदीबहिनी पनि उठे र प्रहरीलाई जानकारी गराउनुअघि नै सबैले आफ्नो ओछ्यान परिवर्तन गरे । तर, बारम्बार सोधपुछपछि उनीहरूले अपराध स्वीकार गरेका थिए । किशोर, उनका दुई दिदीबहिनी र आमालाई नियन्त्रणमा लिएर थप कानुनी कारबाही भइरहेको सिंहले बताए ।
