काठमाडौं । दाहसंस्कार गरी जमिनमा गाडिएको शव प्रहरीले उत्खनन् गरेको छ ।
आत्महत्याका कारण मृत्यु भएको भनी परिवारका सदस्यले हत्तारमा गाडेको शव शंकाश्पद देखिएपछि फेरि निकालिएको हो ।
गोरखाको बारपाक सुलिकोट गाउँपालिका–४ भण्डारी गाउँ बस्ने ४५ वर्षीया रनमाया गुरुङ गत साउन ४ गते राति १० बजे आफ्नै घरभित्र झुण्डिएको अवस्थामा फेला परेकी थिइन् । घटनापश्चात् मृतकका श्रीमान ४६ वर्षीय मारज गुरुङले पत्नीको आत्महत्या भएको बताएका थिए ।
त्यसपछि स्थानीय समेत भेला भई उक्त घटनालाई आत्महत्या नै भनी भोलिपल्ट जातीय परम्पराअनुसार सदगत गरिएको थियो । तर, घटना शंकास्पद रहेको भन्दै रनमायाका दाइ सुकपाल गुरुङले साउन १० गते प्रहरी चौकी सौरापानीमा जाहेरी दर्ता गराएपछि शव उत्खनन् गरिएको हो । शव गाड्नुअघि खिचेको तस्बीरमा मृतकको शरीरमा चोटपटकको दाग देखिएको उनको दाबी छ ।
जिल्ला प्रहरी कार्यालय गोरखा र मातहतबाट खटिएको टोलीले अस्ति शव झिकेर पोष्टमार्टमका लागि महाराजगञ्जस्थित फरेन्सिक मेडिसिन विभाग पठाएको छ ।
घटनाबारे आवश्यक अनुसन्धान भइरहेको प्रहरीले जानकारी दिएको छ ।
